ചെറുവത്തൂർ: അതിർത്തി തർക്കത്തിന്റെ പേരിൽ യുവതിയെ കയ്യേറ്റം ചെയ്തതിന് സിവിൽ പൊലീസ് ഉദ്യോഗസ്ഥനെതിരെ ചന്തേര പൊലീസ് കേസെടുത്തു. കാസർകോട് ടൗൺ പോലീസ് സ്റ്റേഷനിലെ സിവിൽ പൊലീസ് ഓഫീസർ കാലിക്കടവ് കരക്കേരുവിലെ പ്രമോദ് കുമാറിന്റെ പേരിലാണ് കേസെടുത്തത്. അയൽവാസിയായ അജേഷിന്റെ ഭാര്യ സജിന നൽകിയ പരാതിയിലാണ് കേസ്. പ്രമോദ് മർദിച്ചു എന്ന് ആരോപിച്ച് യുവതി ചെറുവത്തൂരിലെ സ്വകാര്യ ആശുപത്രിയിൽ ചികിത്സയിലാണ്. വെള്ളിയാഴ്ച വൈകിട്ട് ആറ് മണിയോടെയാണ് സംഭവം.

ഇരു വീട്ടുകാരും തമ്മിൽ ഒമ്പത് വർഷമായി അതിർത്തി തർക്കം നിലവിലുണ്ട്. ഹോസ്ദുർഗ് മുൻസിഫ് കോടതിയിൽ കേസ് നടക്കുകയാണ്. ഇതിനിടെ പ്രമോദ് കുമാർ വീട്ടിലേക്ക് പോകുമ്പോൾ യുവതി തടയുകയും, ഇതേച്ചൊല്ലി വാക്കുതർക്കവും കയ്യാങ്കളിയും ഉണ്ടായി എന്നാണ് പറയുന്നത്. അതിനിടെ അയൽവാസികൾ കയ്യേറ്റം ചെയ്തുവെന്ന് ആരോപിച്ച് സിവിൽ പൊലീസ് ഉദ്യോഗസ്ഥർ പ്രമോദ് കുമാറിനെയും ഭാര്യയേയും ചെറുവത്തൂർ യൂണിറ്റി ആശുപത്രിയിൽ പ്രവേശിപ്പിച്ചിട്ടുണ്ട്.