മൂവാറ്റുപുഴ : മൂവാറ്റുപുഴയിൽ സഹോദരിയുടെ കാമുകനെ വെട്ടിക്കൊലപ്പെടുത്താൻ ശ്രമിച്ച കേസിലെ പ്രതി ബേസിൽ പിടിയിൽ. മൂവാറ്റുപുഴ പൊലീസാണ് ബേസിലിനെ അറസ്റ്റ് ചെയ്തത് മൂവാറ്റുപുഴയിലെ ആളൊഴിഞ്ഞ കെട്ടിടത്തിൽ നിന്നാണ് പ്രതിയെ പിടികൂടിയത്. പ്രതിയെ മൂവാറ്റുപുഴ പോലീസ് സ്‌റ്റേഷനിലെത്തിച്ചു.
സഹോദരിയെ പ്രണയിച്ചുവെന്ന കാരണത്തിലാണ് സുഹൃത്തായ അഖിൽ ശിവനെ പ്രതിയും സുഹൃത്തുക്കളും ചേർന്ന് ആക്രമിച്ചത്. കേസിലെ രണ്ടാംപ്രതിയായ കോതമംഗലം സ്വദേശിയായ 17കാരനെ പൊലീസ് ഞായറാഴ്ച രാത്രിയോടെ കസ്റ്റഡിയിലെടുത്തിരുന്നു. 17കാരനൊപ്പമാണ് ബേസിൽ അഖിലിനെ ആക്രമിക്കാനായി മൂവാറ്റുപുഴ ഹോളിമാഗി പള്ളി സെമിത്തേരിക്ക് മുന്നിൽ ബൈക്കിലെത്തിയത്. പിടിയിലായ രണ്ടാംപ്രതിയാണ് ബൈക്ക് ഓടിച്ചിരുന്നത്. ആക്രമണത്തിനു ശേഷം ബേസിലും രണ്ടാം പ്രതിയായ സുഹൃത്തും ബൈക്കിൽ തന്നെ കടന്നുകളയുകയായിരുന്നു.