തിരുവനന്തപുരം:പൊലീസുകാരന്റെ വെട്ടേറ്റ ഭാര്യയും മരിച്ചു. റിട്ട ഹെഡ് കോൺസ്റ്റബിളായ ലീലയാണ് മരിച്ചത്.വട്ടിയൂർക്കാവ് തൊഴുവൻകോട് ക്ഷേത്രത്തിന് സമീപം താമസിക്കുന്ന റിട്ട.എ.എസ്.ഐ പൊന്നൻ (75) ഭാര്യയെ വെട്ടിപ്പരിക്കേൽപിച്ച ശേഷം തൂങ്ങി മരിച്ചിരുന്നു. തലയ്ക്ക് വെട്ടേറ്റ ലീലയെ (73) ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഇന്ന് രാവിലെ 7 മണിയോടെയായിരുന്നു സംഭവം.

പെൺമക്കളെ വിവാഹം കഴിപ്പിച്ചയച്ചശേഷം പൊന്നനും ഭാര്യയും മാത്രമായിരുന്നു ഇവിടെ താമസം. ഭാര്യയുമായി വഴക്കിട്ട പൊന്നൻ അവരെ അടുക്കളയിലുണ്ടായിരുന്ന വാക്കത്തി ഉപയോഗിച്ച് തലയിൽ വെട്ടുകയായിരുന്നു. വെട്ടേറ്റ് രക്തത്തിൽ കുളിച്ച ലീല ബോധരഹിതയായി. ലീലയ്ക്ക് അനക്കമില്ലെന്ന് കണ്ട പൊന്നൻ ഭാര്യ മരിച്ചെന്ന് കരുതി തൂങ്ങിമരിച്ചതാകാമെന്നാണ് കരുതുന്നത്. വീട്ടിലെത്തിയ അയൽവാസിയാണ് സംഭവം പൊലീസിനെ അറിയിച്ചത്.