ന്യൂയോർക്ക്: കൊവിഡ് രോഗികളുടെ എണ്ണം പെരുകിക്കൊണ്ടിരിക്കുമ്പോഴും ട്രംപിൻെറ വീരവാദത്തിന് ഒരു കുറവുമില്ല. കൊവിഡിൽ നിന്ന് അമേരിക്ക ശക്തമായ തിരിച്ചു വരവിനൊരുങ്ങുകയാണെന്ന് ട്രംപ് പറയുന്നത്. 'വളരെ വലിയ ഒരു തിരിച്ചുവരവിനാണ് ഞങ്ങൾ ഒരുങ്ങുന്നത്. മികച്ച രീതിയിൽ തന്നെ മുന്നോട്ട് പോകുന്നുണ്ട്. തൊഴിൽ സാദ്ധ്യതകൾ മികച്ചതായി. ഓരോ ആഴ്ചയിലും തൊഴിലവസരങ്ങൾ കൂടുകയാണ്. സാമ്പത്തികമായും മികച്ച ഒരു മടങ്ങിവരവ് തന്നെയാണ് നടത്തുന്നത്. ഫെഡറൽ റിസർവിൽ നിന്നും നല്ല വാർത്തകൾ വരുന്നു. എല്ലാം നല്ല രീതിയിൽ പോകുന്നു മാദ്ധ്യമങ്ങളോട് ട്രംപ് പറഞ്ഞു.

രാജ്യത്ത് കൊവിഡ് ബാധിതരുടെ എണ്ണം ഇരുപത് ലക്ഷം കടന്നിരിക്കുമ്പോഴാണ് ട്രംപിൻെറ വീരവാദം..

വേൾഡോമീറ്റർ കണക്കുകൾ പ്രകാരം 2,066,401 പേർക്കാണ് യു.എസിൽ കൊവിഡ് സ്ഥിരീകരിച്ചത്. 1,15,130 പേർ മരിച്ചു. കഴിഞ്ഞ 24 മണിക്കൂറിനിടെ മാത്രം 1,082 മരണങ്ങളാണ് റിപ്പോർട്ട് ചെയ്തത്. രോഗവ്യാപനം നിയന്ത്രിക്കാൻ ഇതുവരെ രാജ്യത്തിന് കഴിഞ്ഞിട്ടില്ലെന്നാണ് കുത്തനെ ഉയരുന്ന രോഗികളുടെ എണ്ണം സൂചിപ്പിക്കുന്നത്.