വാഷിംഗ്​ടൺ: കൊവിഡ് മാരകമായി ബാധിച്ചതിനെ തുടർന്ന്​ ഇരു ​ശ്വാസകോശങ്ങളും തകരാറിലായ അമേരിക്കൻ യുവതിക്ക്​ പുതുജീവൻ. ആ രക്ഷാദൗത്യത്തിന് ചുക്കാൻ പിടിച്ചതോ, അങ്കിത് ഭാരത് എന്ന ഇന്ത്യൻവംശജനായ ഡോക്ടറും സംഘവും. അങ്കിതും സംഘവും നടത്തിയ ശ്വാസകോശ മാറ്റിവയ്ക്കൽ ശസ്ത്രക്രിയ വിജയകരമായതോട് 20 കാരിക്ക് പുതുജീവനായി.

കൊവിഡ്​ മഹാമാരിയുമായി ബന്ധപ്പെട്ട്​ അമേരിക്കയിൽ നടക്കുന്ന ആദ്യത്തെ ശ്വാസകോശ മാറ്റിവെക്കൽ ശസ്​ത്രക്രിയയാണിത്​. പെൺകുട്ടിയുടെ ജീവൻ അപകടത്തിലായിരുന്നു. ശ്വാസകോശം മാറ്റിവെച്ചില്ലായിരുന്നുവെങ്കിൽ അവൾക്ക്​ ജീവൻ നഷ്​ടമായേ​നെ എന്നും ചിക്കാഗോയിലെ നോർത്​ വെസ്​റ്റേൺ മെഡിസിൻ അറിയിച്ചു.

‘ഞാൻ ഇതുവരെ ചെയ്​തതിൽ ഏറ്റവും സങ്കീർണ്ണവും വെല്ലുവിളിയേറിയതുമായ ട്രാൻസ്​പ്ലാന്റ് സർജറിയായിരുന്നു അത്​. കൊവിഡ്​ 19 വൈറസ്​ ഏറ്റവും മോശമായി ബാധിക്കുന്ന രോഗികൾക്ക്​ ഇനി അവയവം മാറ്റിവെക്കൽ നിർബന്ധിതമാവുന്ന സാഹചര്യം വന്നേക്കാമെന്നും തൊറാസിക്​ സർജറി തലവനും നോർത്ത് വെസ്​റ്റേണിലെ ശ്വാസകോശ മാറ്റിവെക്കൽ പ്രോഗ്രാമി​ന്റെ ഡയറക്​ടറുമായ അങ്കിത്​ ഭാരത്​ വ്യക്​തമാക്കി. ഈ രോഗം മൂലം ചില രോഗികളുടെ ശ്വാസകോശത്തിന്​ കൂടുതൽ അപകടം ഉണ്ടായേക്കാം.. അത്തരം സാഹചര്യങ്ങളിൽ ശ്വാസകോശം മാറ്റിവയ്ക്കൽ അല്ലാതെ മറ്റൊരു വഴിയില്ല." -അദ്ദേഹം കൂട്ടിച്ചേർത്തു.

മെയ്​ 26ന്​ ആസ്​ട്രിയയിലാണ്​ കൊവിഡ്​ രോഗിയുടെ ജീവൻ രക്ഷിക്കാനായി ലോകത്തെ ആദ്യ ശ്വാസകോശം മാറ്റിവെക്കൽ ശസ്​ത്രക്രിയ നടന്നത്​​. 45കാരിയായ സ്​ത്രീയായിരുന്നു അന്ന് കൊവിഡിനെ അതിജീവിച്ച് ജീവിതത്തിലേക്ക് തിരികെവന്നത്.​