സോഷ്യൽ മീഡിയയിൽ എല്ലാവിഷയങ്ങളിലും തന്റെ അഭിപ്രായം വെട്ടിത്തുറന്നു പറയുന്ന വ്യക്തിയാണ് അവതാരക എന്ന നിലയിൽ ശ്രദ്ധേയയായ അശ്വതി ശ്രീകാന്ത്.. സമകാലീന വിഷയങ്ങളിൽ അശ്വതിയുടെ നിലപാടുകൾക്ക് സോഷ്യൽ മീഡിയയിൽ ആരാധകർ മികച്ച പിന്തുണയാണ് നൽകുന്നത്.. ഇപ്പോഴിതാ പാഠഭാഗത്തിലെ ചില പ്രായോഗിക തെറ്റുകളെ ചൂണ്ടിക്കാട്ടുകയാണ് അശ്വതി.
അശ്വതിയുടെ കുറിപ്പ്
അച്ഛനും അമ്മയും കുട്ടിയും സഹോദരങ്ങളും ചേർന്നതാണ് കുടുംബം എന്ന് ടീച്ചർ കുട്ടികളോട് ആവർത്തിച്ച് ഉറപ്പിക്കുന്നു. ഓരോരുത്തരുടെയും വീടുകളിൽ ആരൊക്കെയുണ്ടെന്ന് അന്വേഷിക്കുന്നു. സിലബസ് അങ്ങനെയാണ് !! കേട്ടപ്പോൾ പക്ഷേ സിംഗിൾ പേരെന്റ്സിന്റെ കുട്ടികളെ ഓർത്തു. ഒറ്റയാൾ പോരാട്ടങ്ങൾ നടത്തി ഒരു കുറവുമറിയിക്കാതെ മക്കളെ വളർത്തുന്ന ഒരുപാട് പെണ്ണുങ്ങളുണ്ടിവിടെ...അമ്മയില്ലാത്ത കുറവറിയിക്കാതെ കുഞ്ഞുങ്ങളെ പൊന്നു പോലെ നോക്കുന്ന അച്ഛൻമാരുമുണ്ട്. സമൂഹത്തിലെ ഇത്തരം ചട്ടക്കൂടുകളെക്കുറിച്ചുള്ള തിരിച്ചറിവുകൾ അവരുടെ കുഞ്ഞുങ്ങൾ എങ്ങനെയാവും ഉൾക്കൊള്ളുക !! തങ്ങൾക്ക് മാത്രം എന്തോ ഒന്ന് കുറവാണെന്ന്, അല്ലെങ്കിൽ തങ്ങളുടേത് ഒരു കുടുംബം പോലും അല്ലെന്നാണോ അവർ മനസ്സിലാക്കേണ്ടത്? കൂടുമ്പോൾ സന്തോഷമുള്ളിടമെല്ലാം കുടുംബമാണെന്ന് എന്നാണീ നാടിന്റെ സിലബസ് തിരുത്തുക !!