തിരുവന്തപുരം: ജി.എസ്.ടി. കണക്കുകൾ സമർപ്പിക്കാൻ വൈകിയവർക്ക് പിഴയിലും പലിശയിലും ജി.എസ്.ടി. കൗൺസിൽ ഗണ്യമായ ഇളവു വരുത്തി. 2017 ജൂലായ് മുതൽ 2020 ജനുവരി വരെ റിട്ടേൺ ഫയൽ ചെയ്യാത്തവർക്ക് ലേറ്റ് ഫീയിൽ ഇളവുകൾ അനുവദിച്ച് കുടിശ്ശിക മാപ്പാക്കൽ പദ്ധതി പ്രഖ്യാപിച്ചു. മറ്റുള്ളവർക്ക് നിലവിലുള്ള പരാമവധി ലേറ്റ് ഫീസ് 10,000 രൂപയിൽ നിന്ന് 500 രൂപയായി കുറച്ചു. ഈ ആനുകൂല്യം ജൂലായ് ഒന്നു മുതൽ ലഭിക്കും. സെപ്തംബർ 30നകം കുടിശിക റിട്ടേൺ ഫയൽ ചെയ്യുന്നവർക്കാണ് ഈ ആനുകൂല്യം.

അഞ്ചുകോടിയിൽ താഴെ വിറ്റുവരവുള്ള ചെറുകിടവ്യാപാരികൾക്ക് ജി.എസ്.ടി. റിട്ടേൺ ഫയൽചെയ്യുന്നതിന് അനുവദിച്ചിരുന്ന ഇളവുകൾ സെപ്തംബർവരെ നീട്ടി. ലേറ്റ് ഫീ, പലിശ എന്നിവയിലാണ് ഇളവ്. ഫെബ്രുവരി, മാർച്ച്, ഏപ്രിൽ മാസങ്ങൾക്ക് നൽകിയ ഇളവ് മേയ്, ജൂൺ, ജൂലായ് മാസങ്ങളിലെ റിട്ടേണുകൾക്കും ലഭിക്കും.