ബീജിംഗ്:- മത്സ്യ ചന്തയിൽ ഉപയോഗിക്കുന്ന ചോപ്പിംഗ് ബോർഡുകളിൽ കൊറോണ രോഗാണു സാന്നിദ്ധ്യം സ്ഥിരീകരിച്ചതിനെ തുടർന്ന് ചൈനയിലെ ബീജിങ്ങിലുളള ത്സിൻഫാഡി മൊത്തവ്യാപാര ചന്ത അടപ്പിച്ചു. ചൈനീസ് തലസ്ഥാന നഗരത്തിലെ ഏറ്റവും വലിയ പച്ചക്കറി-മാംസ വിൽപന ചന്തയാണിത്.

വിൽപനക്കാരിൽ നിന്നും ജീവനക്കാരിൽ നിന്നുമായി ശേഖരിച്ച 517 സാമ്പിളുകളിൽ 45 എണ്ണമെങ്കിലും കൊവിഡ് പോസിറ്റീവാണ്. ചന്തയോട് ചേർന്നുള്ള വീടുകളുള്ള ഭാഗങ്ങളിൽ പൂർണ്ണ ലോക്ഡൗൺ നടപ്പാക്കി. കൂടുതൽ കേസുകൾ ഉണ്ടാകാമെന്നും അതിനായുള്ള പരിശോധന കർശനമായി നടന്നു വരികയാണെന്ന് അധികൃതർ അറിയിച്ചു.

കൊവിഡ് വീണ്ടും റിപ്പോർട്ട് ചെയ്തതിനെ തുടർന്ന് സ്ഥലത്തെ സൂപ്പ‌ർ മാർക്കറ്റ് ശൃംഖലകളെല്ലാം ഇവിടെ നിന്നും മത്സ്യം വാങ്ങുന്നത് നിർത്തിവച്ചു. ഏകദേശം 55 ദിവസത്തിനു ശേഷം കഴിഞ്ഞ ആഴ്ചയിലാണ് ഒരു 52 വയസ്സുകാരന് ബീജിങ്ങിൽ രോഗം സ്ഥിരീകരിച്ചത്. രണ്ട് ദിവസത്തിനകം ആറോളം പേർ‌ക്ക് രോഗം സ്ഥിരീകരിച്ചു.