മുഖ്യമന്ത്രി പിണറായി വിജയന്റെ മകളായ വീണയും ഡി.വൈ.എഫ്.ഐ ദേശീയ പ്രസിഡന്റുമായ മുഹമ്മദ് റിയാസും വിവാഹിതരാകാൻ പോകുന്നു എന്ന വാർത്ത പുറത്ത് വന്നതിനു ശേഷം നിരവധി പേരാണ് അശ്ലീലം നിറഞ്ഞതും അങ്ങേയറ്റം മോശവുമായ കമന്റുകളുമായി രംഗത്ത് വന്നത്.

ഇതിനിടയിൽ ചില വിഭാഗക്കാർ വിഷയത്തെ വർഗീയവത്കരിക്കാൻ ശ്രമിക്കുകയും മറ്റു ചിലർ പാരമ്പര്യവാദം കൊണ്ട് ഇരുവരുടെയും വിവാഹത്തെ അളക്കാനും ശ്രമിച്ചു. ഏതായാലും ഇപ്പോൾ വിഷയത്തിൽ പ്രതികരിച്ചുകൊണ്ട് എഴുത്തുകാരൻ ബെന്യാമിനും രംഗത്തെത്തിയിരിക്കുകയാണ്.

അന്യരുടെ ജീവിതത്തിലേക്ക് ഒളിഞ്ഞുനോക്കുന്ന സ്ഥിരം മലയാളി സ്വഭാവമാണ് ഈ സംഭവത്തിന് പിന്നിലുമെന്നാണ് എഴുത്തുകാരൻ തന്റെ ഫേസ്ബുക്ക് കുറിപ്പിലൂടെ പറയുന്നത്. ഇനിയും ഈ സ്വഭാവം മലയാളി മാറ്റിയില്ലെങ്കിൽ ഇതര സമൂഹങ്ങളുടെ പരിഹാസം നേരിടേണ്ടതായി വരുമെന്ന് പറഞ്ഞുകൊണ്ടാണ് ബെന്യാമിൻ തന്റെ കുറിപ്പ് അവസാനിപ്പിക്കുന്നത്.

ഫേസ്ബുക്ക് കുറിപ്പിന്റെ പൂർണരൂപം:

'ഏതൊരു മനുഷ്യന്റെയും ജീവിതം അവന്റെ സ്വകാര്യതയാണ്. സ്വന്തം ഇഷ്ടങ്ങൾക്കനുസരിച്ചു ജീവിക്കാൻ അവനു സ്വാതന്ത്ര്യവും ഉണ്ട്. ഇതര മനുഷ്യർക്ക് അതുമൂലം കുഴപ്പമൊന്നും ഉണ്ടാവുന്നില്ലെങ്കിൽ ആ സ്വാതന്ത്ര്യത്തിന്മേൽ കൈകടത്താൻ പൊതുസമൂഹത്തിനു ഒരു അവകാശവുമില്ല.

പക്ഷേ അന്യന്റെ ജീവിതത്തിനുമേൽ മാന്യതയില്ലാതെ കൈകടത്താൻ തനിക്ക് അവകാശമുണ്ട് എന്ന മട്ടിലാണ് പലപ്പോഴും മലയാളിയുടെ പ്രതികരണം. ഒരു പുരുഷനും സ്ത്രീയും സ്വന്തം ഇഷ്ടപ്രകാരം ഒരു ബീച്ചിൽ പോയിരുന്നാൽ പോലും പിന്നാലെ പമ്മിച്ചെന്നു നോക്കുന്ന ഒരു വിഭാഗം മലയാളിയല്ലാതെ മറ്റാരും ഈ ലോകത്തിൽ തന്നെ കാണില്ല. വിദ്യാഭ്യാസപരമായി നാം കുറെ വളർന്നിട്ടുണ്ടവാം. പക്ഷേ മാനസികമായി നാം ഏറെ ദൂരം മുന്നോട്ട് പോകേണ്ടിയിരിക്കുന്നു എന്ന് ഓരോ അനുഭവങ്ങളും നിരന്തരം തെളിയിച്ചുകൊണ്ടേയിരിക്കുന്നു.