തിരുവനന്തപുരം: കൊവിഡ് കാലത്ത് അടച്ചിട്ടിരുന്ന വീടിന് 5711 രൂപ വൈദ്യുതി ബിൽ നൽകിയ കെ.എസ്.ഇ.ബിക്കെതിരെ നടൻ മധുപാൽ നൽകിയ പരാതിയിൽ നടപടി. അധികബിൽ 300 രൂപയായാണ് വെട്ടിക്കുറച്ചത്.നാല് മാസമായി അടഞ്ഞ് കിടന്ന വീട്ടിലാണ് 5711 രൂപ ഈടാക്കിയത്. ഇക്കാര്യത്തിൽ കെ.എസ്.ഇ.ബി ചെയർമാന് മധുപാൽ പരാതി നൽകിയിരുന്നു.

പേരൂർക്കട സെക്‌ഷനിൽ ഫെബ്രുവരി 12 മുതൽ അടച്ചിട്ടിരിക്കുന്ന വീട്ടിൽ ജൂൺ നാലിന് റീഡിംഗ് എടുത്തപ്പോൾ നൽകിയത് 5711 രൂപയുടെ ബില്ലാണെന്നായിരുന്നു മധുപാലിന്റെ പരാതി. വീട് പൂട്ടി കിടക്കുകയാണ് എന്ന് ബില്ലിൽ എഴുതിയിട്ടുണ്ടെന്നും എന്നിട്ടാണ് ഉയർന്ന ബില്ല് വന്നതെന്നും പരാതിയിൽ പറയുന്നു. അതേസമയം, വീട് അടച്ചിട്ടിരിക്കുമ്പോൾ റീഡിംഗ് എടുക്കാന്‍ സാധിക്കാതെ വന്നാൽ മൂന്ന് മുൻമാസത്തിലെ ശരാശരി എടുത്ത് ബില്ലായി തരും. അതുകൊണ്ടാണ് ഇത്തരത്തിൽ ബില്ല് വന്നതെന്നായിരുന്നു ചെയർമാന്റെ മറുപടി.