ബീജിംഗ്: കൊവിഡ്​ കേസുകൾ വീണ്ടും റി​പ്പോർട്ട്​ ചെയ്​തതോടെ നിയന്ത്രണങ്ങൾ കടുപ്പിച്ച്​ ചൈനയുടെ തലസ്ഥാനമായ ബീജിംഗ്​. ഇന്നലെ രാവിലെയോടെ 1225 വിമാനങ്ങൾ റദ്ദാക്കി. ബീജിംഗിലെ പ്രധാന വിമാനത്താവളങ്ങളിൽ നിന്ന്​ പുറപ്പെടുന്നതും എത്തിച്ചേരുന്നതുമായ വിമാന സർവീസുകളുടെ 70 ശതമാനത്തോളം വരും ഇത്​. രാജ്യത്ത് കൊവിഡി​ന്റെ രണ്ടാം തരംഗമാണിതെന്നാണ്​ വിലയിരുത്തൽ.

രോഗബാധ കുറഞ്ഞതിനെ തുടർന്ന്​ തുറന്ന് പ്രവർത്തിച്ച സ്​കൂളുകളെല്ലാം അടച്ചു. ക്ലാസുകൾ ഓൺലൈൻ മുഖേനയാക്കി. പഴം-പച്ചക്കറി മൊത്തക്കച്ചവട മാർക്കറ്റുമായി ബന്ധപ്പെട്ടാണ് നഗരത്തിൽ​ കൊവിഡ്​ വീണ്ടും വ്യാപിച്ചതെന്നാണ്​ കരുതുന്നത്​. മെയ്​ 30 മുതൽ രണ്ട്​ ലക്ഷത്തിലേറെ ആളുകൾ ഈ മാർക്കറ്റിൽ എത്തിയതായാണ്​ അധികൃതർ പറയുന്നത്​. ഇവിടുത്തെ 8000ത്തോളം വരുന്ന ജോലിക്കാരെ കൊവിഡ്​ പരിശോധനയ്ക്ക്​ വിധേയമാക്കുകയും ക്വാറന്റൈനിലാക്കുകയും ചെയ്​തു.

ഇന്നലെ 31 പേർക്കാണ്​ പുതുതായി കൊവിഡ്​ സ്ഥിരീകരിച്ചത്​. ഇതോടെ ജനങ്ങളോട്​ വീടുകളിൽ നിന്ന്​ പുറത്തിറങ്ങരു​തെന്ന്​ അധികൃതർ നിർദേശം നൽകി. കൊവിഡ്​ ബാധിതരുമായി സമ്പർക്കത്തിലേർപ്പെട്ടതായി കരുതുന്ന ആയിരക്കണക്കിനാളുകളെ പരിശോധനയ്ക്ക്​ വിധേയമാക്കിയിട്ടുണ്ട്​. നഗരത്തിൽ ജനങ്ങൾ തിങ്ങിപ്പാർക്കുന്ന ഏകദേശം 30 സ്ഥലങ്ങൾ അടച്ചിട്ടിരിക്കുകയാണ്​. കഴിഞ്ഞ ആറ്​ ദിവസംകൊണ്ട്​ 137 പേർക്കാണ്​ നഗരത്തിൽ കൊവിഡ്​ സ്ഥിരീകരിച്ചത്​.

ലോകത്ത് കൊവിഡ് രോഗികളുടെ എണ്ണം 82 ലക്ഷമായി. അമേരിക്ക, ബ്രസീൽ എന്നിവിടങ്ങളിലാണ് സ്ഥിതി ഗുരുതരമായി തുടരുന്നത്. അമേരിക്കയിൽ രോഗികൾ 22 ലക്ഷമായി. മരണം -1.19 കഴിഞ്ഞ രണ്ട് ദിവസമായി 400ന് താഴെയായിരുന്നു അമേരിക്കയിലെ പ്രതിദിന മരണനിരക്ക്. ഇന്നലെ ഇത് 700ന് മുകളിലെത്തി. ബ്രസീലിൽ രോഗികൾ ഒൻപത് ലക്ഷത്തിലധികമായി. മരണം - 45,456. റഷ്യയിൽ ഇന്നലെ 7,843 പേർക്ക് രോഗം സ്ഥിരീകരിച്ചു. പ്രതിദിന മരണം 194. ആകെ മരണം - 7,478. അതേസമയം, ലോകത്ത്, 43 ലക്ഷം പേർ കൊവിഡ് മുക്തരായി.