അണ്ണൻ തമ്പി എന്ന മമ്മൂട്ടി ചിത്രത്തിലൂടെ മലയാള സിനിമയിലേക്ക് എത്തിയ നടിയാണ് പൗളി വിൽസൺ. പതിറ്റാണ്ടുകൾ നീണ്ട നാടകാഭിനയം നൽകിയ കരുത്തായിരുന്നു സിനിമയിലും പൗളിക്ക് തുണയായത്. ആദ്യകാലങ്ങളിലെ ചെറിയ വേഷങ്ങളിൽ തുടങ്ങി പിന്നീട് മംഗ്ളീഷ്, ലീല തുടങ്ങി ഈ മ യൗവിലൂടെ സംസ്ഥാന പുരസ്‌കാര ജേത്രിയായും പൗളി തിളങ്ങി.
ഇപ്പോഴിതാ മെഗാ സ്റ്റാർ മമ്മൂട്ടിയെ കുറിച്ചുള്ള പൗളിയുടെ വാക്കുകൾ സമൂഹ മാദ്ധ്യമങ്ങളിൽ ശ്രദ്ധ നേടുകയാണ്.
'എല്ലാവരും പറയും മമ്മൂക്ക ഭയങ്കര ഭീകരനാണെന്ന്. എനിക്കങ്ങനെ തോന്നിയിട്ടില്ല. ഒരുപരിചയവും ഇല്ലത്തവരോട് ആരും എന്താണെന്ന് ചോദിക്കില്ലല്ലോ? അതാണ് ആളുകൾ ഉദ്ദേശിക്കുന്നത്. പരിചയമുള്ളവരോടൊക്കെ മമ്മൂക്ക വളരെ ഫ്രീയാണ്. എല്ലാവരോടും നല്ല കമ്പിനിയുള്ള ആളുതന്നെയാണ്. പിന്നെ അവരുടെ പൊസിഷൻ അനുസരിച്ച് കുറച്ചൊക്കെ അങ്ങനെ തന്നെ നിൽക്കണം. ആരെയും കുറ്റം പറഞ്ഞിട്ട് കാര്യമില്ല.
ഇടയ്‌ക്ക് ഒരു സംഭവമുണ്ടായത്; വൈപ്പിനിൽ വന്നപ്പോൾ മമ്മൂക്ക കാറിന്റെ ഡോർ തുറന്നില്ലെന്ന് പറഞ്ഞ് ചിലർ ഒരുപാട് ഒച്ചപ്പാടുണ്ടാക്കി. ജംഗാറിൽ കയറാൻ വന്ന സമയത്ത് മമ്മൂക്ക കാറിന്റെ ചില്ല് തുറന്നില്ല. ഒടുവിൽ തുറക്കെടോ എന്നുവരെയായി. ചില്ലു തുറന്നിരുന്നെങ്കിലോ? കൈയിട്ട് മമ്മൂക്കയെ പിടിച്ചേനെ. അതൊക്കെ ഒരു അസ്വസ്ഥതയല്ലേ? അതുകൊണ്ടുതന്നെയാണ് അവർ ഇത്തരത്തിൽ പെരുമാറുന്നത്. അല്ലാതെ ഏതു കൊച്ചുകുട്ടിയുടെ അടുത്തും കൂടാൻ പറ്റിയ സ്വഭാവമാണ് മമ്മൂക്കയുടേത്. ഉള്ളിൽ ഒരുവെറുപ്പും ആരോടുമില്ല. എല്ലാവരോടും സ്‌നേഹത്തോട് തന്നെയാണ് അദ്ദേഹം പെരുമാറുന്നത്'- പൗളി പറയുന്നു.