ന്യൂഡൽഹി: ഇന്ത്യ-ചൈന സംഘർഷങ്ങളുടെ പശ്ചാത്തലത്തിൽ ചൈനീസ് ഉത്‌പന്നങ്ങൾക്ക് കടുത്ത നിയന്ത്രണങ്ങൾ ഏർപ്പെടുത്താനൊരുങ്ങി കേന്ദ്രസർക്കാർ. ചൈനയിൽ നിന്ന് ഇറക്കുമതി ചെയ്യുന്ന 300 ഉത്പന്നങ്ങളുടെ തീരുവ വർദ്ധിപ്പിക്കാനാണ് കേന്ദ്രം ആലോചിക്കുന്നത്. ചൈനയിൽ നിന്ന് ഇന്ത്യയിലേക്ക് ഇറക്കുമതി ചെയ്യുന്ന ഉത്പന്നങ്ങളുടെ ലൈസൻസിംഗ് സംവിധാനവും ഉത്പന്നങ്ങളുടെ ഗുണനിലവാര പരിശോധനയും ശക്തിപ്പെടുത്താനും കേന്ദ്രസർക്കാർ ഉദ്ദേശിക്കുന്നതായാണ് വിവരം.

ചൈനീസ് കമ്പനികൾക്ക് കടിഞ്ഞാണിടാനുള്ള നീക്കവും കേന്ദ്രത്തിന്റെ ഭാഗത്ത് നിന്നുണ്ടെന്നാണ് സർക്കാർ വൃത്തങ്ങൾ നൽകുന്ന സൂചന. സർക്കാർ കരാറുകളിൽ നിന്ന് ചൈനീസ് കമ്പനികളെ ഒഴിവാക്കാൻ തീരുമാനിച്ചതായാണ് പുറത്തുവരുന്ന റിപ്പോർട്ടുകൾ. സുരക്ഷ കൂടി മുൻനിർത്തിയാണ് രാജ്യം ഇത്തരത്തിലൊരു തീരുമാനത്തിലേക്ക് കടക്കുന്നതായാണ് വിവരം. 200 കോടിയിൽ താഴെയുള്ള പദ്ധതികളുടെ കരാർ വിദേശ കമ്പനികൾക്ക് നൽകരുതെന്ന് കേന്ദ്രസർക്കാർ നേരത്തെ തീരുമാനമെടുത്തിരുന്നു.