വിശേഷ അവസരങ്ങളിൽ വളരെ വേഗം തയ്യാറാക്കാൻ കഴിയുന്ന വ്യത്യസ്ഥമായൊരു മഹാരാഷ്രൻ വിഭവമാണ് സാബുദാന കിച്ചടി. രുചികരവും പോഷകസമ്പുഷ്ടവുമായ ഒരു വിഭവമാണിത്. സ്വാദിഷ്ടമായ സാബുദാന കിച്ചടി തയ്യാറാക്കുന്ന വിധം നോക്കിയാലോ?​

ആവശ്യമുള്ള ചേരുവകൾ

ചൗവ്വരി - ഒരു കപ്പ്

വെള്ളം - ഒരു കപ്പ്

എണ്ണ - ഒരു ടേബിള്‍ സ്പൂണ്‍

ജീരകം - ഒരു ടീ സ്പൂണ്‍

പച്ചമുളക് - ഒരു ടീസ്പൂണ്‍

കറിവേപ്പില -10 എണ്ണം

വേവിച്ച ഉരുളക്കിഴങ്ങ് - 2 എണ്ണം

നിലക്കടല -3/4 കപ്പ്

പഞ്ചസാര - 3 ടീസ്പൂണ്‍

നാരങ്ങ നീര് - 1 നാരങ്ങ

ഉപ്പ് - പാകത്തിന്

മല്ലിയില,​ വറുത്ത നിലക്കടല (അലങ്കരിക്കുന്നതിന്)​

പാകം ചെയ്യുന്ന വിധം

ചൗവ്വരി ഒരു പാത്രത്തില്‍ എടുത്ത് പശ പോകുന്നത് വരെ നന്നായി കഴുകിയ ശേഷം ഒരു കപ്പ് വെള്ളത്തില്‍ കുതിര്‍ത്ത് വയ്ക്കുക. എട്ട് മണിക്കൂറിന് ശേഷം അധികമുള്ള വെള്ളം കളഞ്ഞ്,​ ഇതിലേയ്ക്ക് പഞ്ചസാര പൊടിച്ചത്, വറുത്ത് പൊടിച്ച നിലക്കടല എന്നിവ ചേര്‍ക്കുക. ഇതിലേക്ക് നാരങ്ങ നീര് ചേർത്ത് നന്നായി യോജിപ്പിക്കുക. ഒരു പാൻ ചൂടാക്കി വെളിച്ചെണ്ണ ഒഴിച്ച്,​ ഇതിലേക്ക് ജീരകവും വേവിച്ച ഉരുളക്കിഴങ്ങ് കഷ്ണങ്ങളും ഇട്ട് രണ്ട് മിനുട്ട് നേരം വഴറ്റുക ശേഷം പച്ചമുളകും, കറിവേപ്പിലയും ചേര്‍ക്കുക. ഇതിലേക്ക് സാബുദാന (ചൗവരി)​ മിശ്രിതം ചേര്‍ക്കുക. പാകത്തിന് ഉപ്പ് ചേര്‍ത്ത് നന്നായി ഇളക്കുക. ഇത് അടച്ച് വെച്ച് എട്ട് മിനുട്ട് നേരം വേവിക്കുക. വിളമ്പുന്നതിന് മുമ്പ് മല്ലിയിലയും വറുത്ത നിലക്കടലയും ചേർത്ത് അലങ്കരിക്കാം.