ജനീവ​: കൊവിഡ്​ മഹാമാരി ലോകത്ത്​ അതിതീവ്രമായ രീതിയിൽ വർദ്ധിച്ചുകൊണ്ടിരിക്കുകയാണെന്ന്​ ലോകാരോഗ്യസംഘടന. വ്യാഴാഴ്​ച പുതുതായി 1,50,000 പേർക്കാണ്​ ലോകത്ത് രോഗം ബാധിച്ചത്​. അമേരിക്കയി​ലെ ആകെ കൊവിഡ്​ രോഗികളുടെ എണ്ണത്തി​​ന്റെ പകുതി​യോളം വരും ഇത്​. ലോകത്ത്​ ഒറ്റ ദിവസമുണ്ടാകുന്ന രോഗികളുടെ ഏറ്റവും ഉയർന്ന അളവാണിതെന്നും സംഘടന അഭിപ്രായപ്പെട്ടു.

‘‘ലോകം പുതിയ, അപകടകരമായ ഘട്ടത്തിലാണ്​. വൈറസ്​ ഇപ്പോഴും ദ്രുതഗതിയിലാണ്​ പടരുന്നത്​. ഇത്​ മാരകമാണ്​, കൂടുതൽ ആളുകളെ​ ഇപ്പോഴും ബാധിക്കുന്നു.’’ - ലോകാരോഗ്യ സംഘടന ഡയറക്​ടർ ജനറൽ ടെഡ്രോസ്​ അദാനോം ഗബ്രിയേസസ്​ ജനീവയിലെ ആസ്ഥാനത്ത്​ നടത്തിയ വെർച്വൽ വാർത്താസമ്മേളനത്തിൽ പറഞ്ഞു. ലോകത്ത്​ ഇതുവരെ 87.83 ലക്ഷത്തിലേറെ ആളുകൾ കൊവിഡ്​ ബാധിതരാവുകയും 4,63,019 പേർ മരിക്കുകയും ചെയ്​തതായാണ്​ റിപ്പോർട്ട്​. അമേരിക്കയെ കൂടാതെ കൂടുതൽ പുതിയ കൊവിഡ്​ ബാധിതർ വരുന്നത്​ സൗത്ത്​ ഏഷ്യയിൽ നിന്നും മിഡിൽ ഈസ്​റ്റിൽ നിന്നുമാണെന്നും അദ്ദേഹം പറഞ്ഞു.

കൊവിഡിന്​ മരുന്ന്​ കണ്ടെത്താനുള്ള പരീക്ഷണങ്ങൾ ലോകത്താകമാനം നടന്നുകൊണ്ടിരിക്കുകയാണ്​​. പാർശ്വഫലങ്ങൾ ഉണ്ടാകുമോ എന്നൊക്കെ അറിയാൻ വലിയ അളവിൽ പരിശോധന​ ആവശ്യമാണ്​. എന്നിരുന്നാലും പ്രതിരോധ മരുന്ന്​ കണ്ടെത്തുകയെന്നത്​ അസാദ്ധ്യമാണെന്നും വളരെ ബുദ്ധിമു​​ട്ടേറിയ യാത്രയിലേക്കാണ്​ പോകുന്നതെന്നും ടെഡ്രോസ്​ അദനോം പറഞ്ഞു. രോഗബാധിതരിൽ 12 ശതമാനം പേരും ആരോഗ്യ പ്രവർത്തകരാണെന്നും അവരുടെ ധീരതയെ അഭിനന്ദിക്കുകയാണെന്നും അദ്ദേഹം കൂ​ട്ടിച്ചേർത്തു.

പല രാജ്യങ്ങളും കൊവിഡി​ന്റെ രണ്ടാം തരംഗത്തിൽ ഭയപ്പാടിലാണെങ്കിലും നിയന്ത്രണങ്ങളിൽ ഇളവ്​ നൽകുകയാണ്​. ഇക്കാര്യത്തിൽ ഘട്ടംഘട്ടമായതും ശാസ്​ത്രീയവുമായ സമീപനമാണ്​ അവലംബിക്കേണ്ടതെന്ന്​ ലോകാരോഗ്യ സംഘടന എമർജൻസി പ്രോഗ്രാം മേധാവി മൈക്​ റയാൻ വ്യക്തമാക്കി. ലോക്ക്ഡൗൺ അവസാനിപ്പിക്കൽ കാര്യം ശ്രദ്ധിച്ചേ നടപ്പാക്കാവൂ എന്നും അദ്ദേഹം കൂട്ടിച്ചേർത്തു.