ലണ്ടൻ: പ്രശസ്ത ബ്രിട്ടീഷ് നടൻ ഇയാൻ ഹോം അന്തരിച്ചു. 88 വയസായിരുന്നു. ലോർഡ് ഒഫ് റിംഗ്സ്, ഏലിയൻ (1979)​, ചാരിയറ്റ്സ് ഒഫ് ഫയർ എന്നിവയാണ് പ്രധാന സിനിമകൾ. 1981ൽ ചാരിയറ്റ്സ് ഒഫ് ഫയറിലെ അഭിനയത്തിന് ഓസ്കർ നാമനിർദേശം ലഭിച്ചിരുന്നു. ' ദ ഹോബിറ്റ്', ' ദ ലോർഡ് ഒഫ് ദ റിംഗ്സ് ' സിനിമാ പരമ്പരകളിൽ ബിൽബോ ബാഗിൻസിന്റെ വേഷം അവതരിപ്പിച്ച് ഏറെ ശ്രദ്ധനേടിയിരുന്നു.

1981ലെ കാൻ ചലച്ചിത്രമേളയിൽ മികച്ച സഹനടനുള്ള പുരസ്‌കാരം നേടി. പാർക്കിൻസൺസ് രോഗം ബാധിച്ചതിനെത്തുടർന്ന് ഏറെനാളായി ചികിത്സയിലായിരുന്നു. വെള്ളിയാഴ്ച രാവിലെയായിരുന്നു അന്ത്യമെന്ന് കുടുംബാംഗങ്ങൾ പറഞ്ഞു. ബ്രിട്ടീഷ് നാടക വേദികളിലെയും അതുല്യ പ്രതിഭയായിരുന്നു. 1998ൽ പുറത്തിറങ്ങിയ 'കിംഗ് ലിയർ' എന്ന ചിത്രത്തിൽ ലിയർ രാജാവിന്റെ വേഷം അവതരിപ്പിച്ചിരുന്നു. 1931ൽ തെക്ക് കിഴക്കൻ ഇംഗ്ലണ്ടിലെ എസിക്സിലാണ് ഹോമിന്റെ ജനനം. 1989ൽ കമാൻഡർ ഒഫ് ബ്രിട്ടീഷ് എമ്പയർ ബഹുമതിയും 1998ൽ നൈറ്റ് പദവിയും നൽകി ഇദ്ദേഹത്തെ ബ്രിട്ടൻ ആദരിച്ചു. 2014ൽ പുറത്തിറങ്ങിയ ' ദ ഹോബിറ്റ് , ദ ബാറ്റിൽ ഒഫ് ദ ഫൈവ് ആർമീസ് ' ആണ് അവസാന ചിത്രം.