ന്യൂഡൽഹി: രാജ്യത്ത് മാത്രമല്ല ലോകത്തും വളരെ പ്രചാരത്തിലുള്ള ഒരു വ്യായാമമായി മാറുകയാണ് യോഗ. ശരീരത്തിനും മനസ്സിനും ഒരു പോലെ ഗുണകരമാണ് യോഗ. ജൂൺ 21ന് അന്താരാഷ്ട്ര യോഗ ദിനമായി ആചരിക്കുന്നു. എന്നാൽ കൊവിഡ് വ്യപകമായി പടരുന്ന സാഹചര്യത്തിലും ലോക്ക്ഡൗൺ തുടരുന്ന സാഹചര്യത്തിലും യു.ജി.സി കോളേജുകൾക്കും സർവ്വകലാശാലകൾക്കുമായി യോഗ ചെയ്യുന്നതിൽ പുതിയ മാർഗ നിർദ്ദേശം നൽകിയിരിക്കുകയാണ്.

വീട്ടിലിരുന്ന് കുടുംബാംഗങ്ങൾക്കൊപ്പം വിദ്യാർത്ഥികളും അധ്യാപകരും യോഗ ചെയ്യണമെന്ന് യു.ജി.സി നിർദ്ദേശിക്കുന്നു. കൂടാതെ, യോ​ഗാദിനം എങ്ങനെ ചെലവഴിച്ചു എന്നതിനെക്കുറിച്ച് ഫേസ്ബുക്ക്, യൂട്യൂബ്, ട്വിറ്റർ, ഇൻസ്റ്റ​ഗ്രാം എന്നീ സമൂഹമാധ്യമങ്ങളിലൂടെ പങ്ക് വെയ്ക്കണമെന്നും യുജിസി അറിയിച്ചു.

കൊവിഡ് വ്യാപനത്തെ തുടർന്ന് വീട്ടിൽ കുടുംബാം​ഗങ്ങൾക്കൊപ്പമിരുന്ന് യോ​ഗ ചെയ്യാൻ പ്രധാനമന്ത്രി മോദി ജനങ്ങളെ മൻ കീ ബാത്തിലൂടെ ആഹ്വാനം ചെയ്തിരുന്നു. കൊവിഡ് വ്യാപനത്തിന്റെ സാഹചര്യം നിലനിൽക്കുന്നതിനാൽ സാമൂഹ്യ അകലം പാലിച്ച് വേണം യോഗ ചെയ്യാൻ. അതിനാൽ ഈ വർഷം കുടുംബാം​ഗങ്ങൾക്കൊപ്പം വീടുകളിലിരുന്ന് യോ​ഗ ചെയ്യാൻ മന്ത്രാലയം ജനങ്ങളെ പ്രോത്സാഹിപ്പിക്കുകയാണെന്ന് ആയുഷ് മന്ത്രാലയം പുറപ്പെടുവിച്ച പ്രസ്താവനയിൽ പറയുന്നു