ന്യൂയോർക്ക്: രണ്ട് പ്രമുഖ ബാറ്റ്മാൻ സിനിമകളടക്കം നിരവധി ഹിറ്റ് ചിത്രങ്ങൾ ഒരുക്കിയ ഹോളിവുഡ് സംവിധായകൻ ജോയൽ ഷുമാക്കർ അന്തരിച്ചു. 80 വയസായിരുന്നു. ന്യൂയോർക്ക് സിറ്റിയിൽ തിങ്കളാഴ്ച പുലർച്ചെയായിരുന്നു അന്ത്യം. കോസ്റ്റ്യൂം ഡിസൈനർ ആയി വന്ന് പിന്നീട് പ്രമുഖ സംവിധായകനായി മാറിയ ജോയൽ ഷുമാക്കർ ഒരുവർഷത്തോളമായി കാൻസർ ബാധിതനായി ചികിത്സയിലായിരുന്നു.

സെന്റ് എൽമോസ് ഫയർ, ദ ലോസ്റ്റ് ബോയ്‌സ് തുടങ്ങി 1980-90 കാലഘട്ടത്തിൽ നിരവധി ഹിറ്റ് സിനിമകൾ സംവിധാനം ചെയ്തു. 1976 ൽ 'സ്പാർക്കിൾ" എന്ന ചിത്രത്തിന്റെ തിരക്കഥ എഴുതിയായിരുന്നു അദ്ദേഹത്തിന്റെ സിനിമാ അരങ്ങേറ്റം. 'ദ ഇൻക്രഡിബിൾ ഷ്രിങ്കിംഗ് വുമൺ" ആണ് സംവിധാനം ചെയ്ത ആദ്യ ചിത്രം. 1995 ൽ പുറത്തുവന്ന 'ബാറ്റ്മാൻ ഫോർ എവർ" ആയിരുന്നു ബാറ്റ്മാൻ സീരീസിലെ ആദ്യ ചിത്രം. 1997 ൽ 'ബാറ്റ്മാൻ ആൻഡ് റോബിനും" ഇറങ്ങി. 2011ൽ പുറത്തു വന്ന ട്രെസ്‌പാസ് ആണ് സംവിധാനം ചെയ്ത അവസാന ചിത്രം.