ന്യൂഡൽഹി: കൊവിഡും ലോക്ക്ഡൗണും സൃഷ്‌ടിച്ച ആഘാതംമൂലം നടപ്പു സാമ്പത്തിക വർഷം (2020-21)​ ഇന്ത്യയിൽ ആളോഹരി വരുമാനം 5.4 ശതമാനം ഇടിയുമെന്ന് എസ്.ബി.ഐയുടെ സാമ്പത്തികകാര്യ വിഭാഗത്തിന്റെ വിലയിരുത്തൽ. ഇന്ത്യയുടെ ജി.ഡി.പി മൂല്യത്തിൽ നടപ്പുവർഷം പ്രതീക്ഷിക്കുന്ന 3.2 ശതമാനം ഇടിവിനേക്കാൾ കൂടുതലാണിത്. 2019-20ലെ 1.52 ലക്ഷം രൂപയിൽ നിന്ന് 1.43 ലക്ഷം രൂപയായാണ് ഈവർഷം ആളോഹരി വരുമാനം ഇടിയുക. ഡൽഹി,​ ഗുജറാത്ത്,​ ചണ്ഡീഗഢ് എന്നിവിടങ്ങളിലെ ഇടിവ് ഇന്ത്യയുടെ ആകെ ഇടിവിനേക്കാൾ മൂന്നിരട്ടിയോളമായിരിക്കും.

ഡൽഹിയിൽ മാത്രം 15.4 ശതമാനം ഇടിവ് ഉണ്ടാകും. 13.9 ശതമാനം ഇടിവാണ് ചണ്ഡീഗഢിൽ പ്രതീക്ഷിക്കുന്നത്; ഗുജറാത്തിൽ 11.6 ശതമാനവും. അരുണാചൽ പ്രദേശും ഗോവയും മാത്രമാണ് വരുമാന വർദ്ധന കുറിക്കുക; 0.3 ശതമാനം വീതം. ഏറ്രവും കുറഞ്ഞ വരുമാനത്തകർച്ച പ്രതീക്ഷിക്കുന്നത് മണിപ്പൂരിൽ; 0.6 ശതമാനം. കേരളത്തിൽ ആളോഹരി വരുമാനം 2.44 ലക്ഷം രൂപയിൽ നിന്ന് 2.25 ലക്ഷം രൂപയായി താഴും; ഇടിവ് 8.2 ശതമാനം.

''ആഗോളതലത്തിലും ആളോഹരി വരുമാനത്തെ കൊവിഡ് തളർത്തും. 6.2 ശതമാനം ഇടിവാണ് ഈവർഷം പ്രതീക്ഷിക്കുന്നത്. ആഗോള ജി.ഡി.പി വളർച്ചയിൽ പ്രതീക്ഷിക്കുന്ന 5.2 ശതമാനം ഇടിവിനേക്കാൾ കൂടുതലാണിത്"",​

സൗമ്യകാന്തി ഘോഷ്,​

മുഖ്യ സാമ്പത്തിക ഉപദേഷ്ടാവ്,​

എസ്.ബി.ഐ

8.2%

കേരളത്തിൽ നടപ്പുവർഷം ആളോഹരി വരുമാനം 8.2 ശതമാനം കുറയും. 2.44 ലക്ഷം രൂപയിൽ നിന്ന് 2.25 ലക്ഷം രൂപയിലേക്കാണ് കുറയുക.

70%

ഇന്ത്യയുടെ ജി.ഡി.പിയിൽ പാതിയിലേറെ പങ്കുവഹിക്കുന്ന മഹാരാഷ്‌ട്ര,​ ഡൽഹി,​ ഗുജറാത്ത് ഉൾപ്പെടെ എട്ട് സംസ്ഥാനങ്ങൾ ഇപ്പോൾ റെഡ് സോണിലാണ്. ഇവയിൽ ചിലയിടങ്ങളിൽ നിയന്ത്രണങ്ങളോടെ വിപണികൾ തുറന്നെങ്കിലും ഉപഭോക്താക്കളുടെ എണ്ണത്തിൽ 70-80 ശതമാനം കുറവുണ്ട്. ഈ അനിശ്ചിതാവസ്ഥയാണ് ആളോഹരി വരുമാനത്തെ ബാധിക്കുക.