അന്തരിച്ച സംവിധായകൻ സച്ചിയെ അനുസ്‌മരിച്ച് പ്രമുഖ അഭിഭാഷകൻ രഞ്ചിത്ത് മാരാർ. സംവിധായകനാകുന്നതിന് മുമ്പ് സച്ചി അഭിഭാഷകനായിരുന്നു. അഭിഭാഷകനായ സച്ചിയെയാണ് സുഹൃത്തുകൂടിയായ രഞ്ചിത്ത് ഓർമ്മപ്പെടുത്തുന്നത്.. 'യാദൃശ്ചികമായി അഭിഭാഷകനായി മാറിയ സച്ചി' എന്ന തലക്കെട്ടോടുകൂടിയാണ് രഞ്ചിത്തിന്റെ ഫേസ്ബുക്ക് കുറിപ്പ് ആരംഭിക്കുന്നത്..

2003ൽ അഭിഭാഷക അസോസിയേഷന്റെ പരിപാടിയുമായി ബന്ധപ്പെട്ട് നാടകം സംവിധാനം ചെയ്‌തത് സച്ചിയായിരുന്നു. അന്ന് ആ നാടകത്തിലേക്കായി ചെണ്ട വായിക്കുന്ന ആൾക്കു വേണ്ടിയുള്ള അന്വേഷണമാണ് സച്ചിയെ പരിചയപ്പെടാനുള്ള അവസരമായി തന്നിലേക്ക് എത്തിയതെന്ന് മാരാർ പറയുന്നു. അഭിനിവേശം സിനിമയായിരുന്നിട്ടുകൂടി ക്രിമിനൽ ലോയർ എന്ന നിലയിലുള്ള കർമ്മപദത്തിലും സച്ചി മികച്ചു നിന്നിരുന്നു. സച്ചിയുടെ ശുപാർശ പ്രകാരമാണ് അഡ്വ. ശ്രീകുമാർ ചേളൂരിന്റെ ജൂനിയറായി തനിക്ക് പ്രവർത്തിക്കാൻ കഴിഞ്ഞതെന്ന് രഞ്ചിത്ത് മാരാർ കുറിപ്പിൽ പറയുന്നുണ്ട്. ജൂനിയർ അഭിഭാഷകനായുള്ള നിലനിൽപ്പിന്റെ ആദ്യകാലഘട്ടത്തിൽ സച്ചി സാമ്പത്തികമായി തന്നെ ധാരാളം സഹായിച്ചിട്ടുണ്ട്. അദ്ദേഹത്തിന് ലഭിച്ചിരുന്ന ഫീസിന്റെ ഒരുഭാഗമാണ് സച്ചി സാർ തനിക്കും തന്നുകൊണ്ടിരുന്നതെന്ന് രഞ്ചിത്ത് മാരാർ ഫേസ്ബുക്കിൽ കുറിച്ചു.