ദുബായ്: വന്ദേഭാരത് മിഷന്റെ ഭാഗമായി യു.എ.ഇയിലേക്ക് ആരേയും കൊണ്ടുവരരുതെന്ന് എയർ ഇന്ത്യയോട് യു.എ.ഇ. മറ്റുള്ള പൗരന്മാർക്കൊപ്പമുള്ളവർക്കും പ്രവേശനമി​ല്ലെന്നാണ് അധി​കൃതർ വ്യക്തമാക്കി​യത്. ജൂലായ് 22 മുതൽ താമസവിസയുള്ളവർക്ക് രാജ്യത്തേക്ക് മടങ്ങിവരുന്നതിന് യു.എ.ഇ അനുമതി നൽകിയിരുന്നു. ഇതേ തുടർന്നാണ് വന്ദേഭാരത് മിഷന്റെ ഭാഗമായി ഇന്ത്യയിൽ നിന്ന് യു.എ.ഇയിലേക്ക് ആളെ കൊണ്ടുവരുന്നതിന് എയർ ഇന്ത്യ അനുമതി തേടിയി​രുന്നത്.

ന്യൂഡ​ൽഹി​യി​ലെ യു.എ.ഇ എംബസിയുടെയോ യു.എ.ഇ വിദേശകാര്യ മന്ത്രാലയത്തിന്റെയോ അനുമതി ഉണ്ടെങ്കിലേ ആളുകളെ കൊണ്ടുവരാൻ കഴി​യൂ എന്നും അല്ലാതെ ആരേയും രാജ്യത്തേക്ക് കൊണ്ടുവരരുതെന്നും യു.എ.ഇ സർക്കാർ എയർ ഇന്ത്യയെ അറിയിച്ചു. അതേസമയം ഇന്ത്യയിൽ നിന്ന് ആളെ കൊണ്ടുപോകുന്നതിന് എമിറേറ്റ്‌സ് വ്യോമയാന മന്ത്രാലയത്തിന്റെ അനുമതി തേടിയിട്ടുണ്ട്.