ന്യൂഡൽഹി: രാജ്യത്ത് 24 മണിക്കൂറിനിടെ കൊവിഡ് ബാധിച്ചവരുടെ എണ്ണം 16,922 ആയി. ഒരു ദിവസത്തെ ഏറ്റവും വലിയ വർദ്ധനവാണിത്. രാജ്യത്തെ മൊത്തം രോഗികളുടെ എണ്ണം ഇതോടെ അഞ്ച് ലക്ഷത്തിനടുത്തെത്തി. 418 പേരാണ് ഇരുപത്തിനാല് മണിക്കൂറിനിടെ കൊവിഡ് ബാധിച്ച് മരിച്ചത്.

ഇന്ത്യയിൽ ആകെ കൊവിഡ് സ്ഥിരീകരിച്ചവരുടെ എണ്ണം 4,73,105 ആയി. ആകെ 14894 പേരാണ് കൊവിഡ് ബാധിച്ച് മരിച്ചത്. രോഗികളുടെ എണ്ണത്തിൽ ഇന്ത്യ നിലവിൽ നാലാം സ്ഥാനത്താണെങ്കിലും അതിവേഗം രോഗംപടരുന്ന രാജ്യങ്ങളുടെ പട്ടികയിൽ മൂന്നാമതാണ്. കഴിഞ്ഞ ഒരാഴ്ചക്കിടെ മാത്രം ലക്ഷത്തിലേറെ പേർക്കാണ് രോഗം ബാധിച്ചിട്ടുള്ളത്. നിലവിൽ 1,86,514 പേരാണ് ഇന്ത്യയില്‍ ചികിത്സയിലുള്ളത്. 2,71,697 പേർ രാജ്യത്ത് കൊവിഡ് മുക്തരായി.

മഹാരാഷ്ട്രയിൽ ആകെ കൊവിഡ് ബാധിതരുടെ എണ്ണം 1,42,900 ആണ്. 6739 പേരാണ് മഹാരാഷ്ട്രയിൽ മരിച്ചത്. ഡൽഹിയിൽ 70,390 പേർക്ക് ഇതുവരെ രോഗം സ്ഥിരീകരിച്ചിട്ടുണ്ട്. 2365 പേർ മരിച്ചു. 28,943 പേർക്ക് രോഗം സ്ഥിരീകരിച്ച ഗുജറാത്തിൽ 1735 മരണവും, 67,468 പേർക്ക് രോഗം സ്ഥിരീകരിച്ച തമിഴ്‌നാട്ടിൽ 866 മരണവുമാണ് റിപ്പോർട്ട് ചെയ്‌തത്.