ഒരു ഓൺലൈൻ ഡെലിവറി വീഡിയോ ആണ് ഇപ്പോൾ സോഷ്യൽ മീഡിയയിൽ ചിരിയുണർത്തുന്നത്.
ഓൺലൈൻ ഡെലിവറി ചെയ്യാൻ കൂടുതൽ നിർദേശങ്ങൾ എന്തെങ്കിലും ഉണ്ടോയെന്ന സ്ഥിരം സന്ദേശത്തിൽ നിന്നാണ് രസകരമായ സംഭവങ്ങളുടെ തുടക്കം. ഈ ചോദ്യത്തിന് ലഭിച്ച മറുപടി ഇങ്ങനെയായിരുന്നു,
"വാതിൽ മൂന്ന് തവണ മുട്ടുക, പിന്നെ, അബ്രാ കഡാബ്ര എന്ന് ഉച്ചത്തിൽ വിളിച്ചു പറഞ്ഞ് അവിടെ നിന്ന് വേഗത്തിൽ ഓടി മറയുക". കസ്റ്റമറുടെ നിർദേശം അക്ഷരംപ്രതി അനുസരിച്ച യുവതി വീട്ടിലെത്തി വാതിലിൽ മൂന്ന് തവണ മുട്ടി വിചിത്ര വാചകം ഉറക്കെ ചൊല്ലിയതിന് ശേഷം നിർദേശിച്ചതു പോലെ ഓടി വാനിൽ കയറുന്ന ദൃശ്യങ്ങളാണ് സിസിടിവിയിൽ പതിഞ്ഞത്.

ലിൻ സ്റ്റഫേരി എന്ന യുവതിയുടെ വീട്ടിലേക്കുള്ള ഓൺലൈൻ ഡെലിവറിയിലാണ് ഈ സംഭവങ്ങൾ അരങ്ങേറിയത്. തന്റെ ഇളയമകന്റെ കുസൃതിയായിരുന്നു ഈ നിർദേശങ്ങളെന്ന് ലിൻ പറയുന്നു. ഡെലിവറി ചെയ്ത ആമസോൺ ജീവനക്കാരിക്ക് നന്ദി പറഞ്ഞ് ലിൻ തന്നെയാണ് ഫേസ്ബുക്കിൽ വീഡിയോ പങ്കുവച്ചത്. ഇതിനകംനിരവധി ഷെയറും രണ്ട് മില്യണിലധികം കാഴ്ചക്കാരുമാണ് വീഡിയോയ്ക്ക് ലഭിച്ചത്. നിരവധി പേർ ആമസോൺ ജീവനക്കാരിക്ക് അഭിനന്ദനമറിയിച്ച് കമന്റും നൽകിയിട്ടുണ്ട്.

ഓൺലൈൻ ഡെലിവറി രസകരമാക്കാൻ "പ്രത്യേക" നിർദേശം നൽകിയ ജേക്കബ് സ്റ്റഫേരിയുടെ മറുപടിയാണ് അതിലും രസകരം. വാതിലിന് പുറത്തുനിന്ന് അബ്രാ കഡാബ്രാ എന്ന ശബ്ദം കേൾക്കുന്നത് രസകരമായിരിക്കും എന്ന തോന്നലിൽ നിന്നാണ് ഇങ്ങനെയൊരു നിർദേശം നൽകിയതെന്ന് ജേക്കബ് പറയുന്നു.
ഒരു മാസം മുമ്പാണ് ഡീഫോൾട്ട് സന്ദേശം ജേക്കബ് മെസേജിൽ സെറ്റ് ചെയ്ത് വെച്ചത്. പിന്നീട് ഇക്കാര്യം മറന്നിരുന്നതായും അപ്രതീക്ഷിതമായി ശബ്ദം കേട്ടതോടെ അമ്പരന്നെന്നും ജേക്കബ്.എന്തായാലും സോഷ്യൽമീഡിയയിൽ വീഡിയോ വൈറലായതോടെ ജീവനക്കാരിക്ക് ആമസോണും പാരിതോഷികം നൽകുമെന്നാണ് റിപ്പോർട്ട്. ഇക്കാര്യം ആമസോൺ അറിയിച്ചതായും ലിൻ സ്റ്റഫേരി പറയുന്നു.