ലണ്ടൻ: ഇന്ത്യയും ചൈനയും തമ്മിലുള്ള അതിർത്തി പ്രശ്‌നങ്ങൾ ഗുരുതരവും ആശങ്കാജനകവുമെന്നും ഇരുരാജ്യങ്ങളും ചർച്ചകളിലൂടെ പ്രശ്‌നങ്ങൾ പരിഹരിക്കാൻ ശ്രമിക്കണമെന്നും ബ്രിട്ടീഷ് പ്രധാനമന്ത്രി ബോറിസ് ജോൺസൺ. ഇന്ത്യാ - ചൈന ബന്ധത്തിലെ പുതിയ സംഭവവികാസങ്ങൾ തങ്ങൾ സസൂക്ഷ്മം നിരീക്ഷിക്കുന്നുണ്ടെന്നും അദ്ദേഹം വ്യക്തമാക്കി.
ഇന്ത്യ-ചൈന അതിർത്തി വിഷയത്തിൽ ഇതാദ്യമായാണ് ബ്രിട്ടീഷ് പ്രധാനമന്ത്രി പരാമർശം നടത്തുന്നത്. ബ്രിട്ടീഷ് പാർലമെന്റിന്റെ അധോസഭയായ ഹൗസ് ഒഫ് കോമൺസിൽ കൺസർവേറ്റീവ് പാർട്ടി എം.പിയുടെ ചോദ്യത്തിന് മറുപടി നൽകവേയാണ് ബോറിസ് ജോൺസൺ ഇക്കാര്യം അറിയിച്ചത്. പ്രശ്‌നങ്ങൾ പരിഹരിക്കാൻ ഇരുരാജ്യങ്ങളും തമ്മിൽ ചർച്ചകൾക്ക് പ്രേരിപ്പിക്കുകയെന്നതാണ് സാദ്ധ്യമായ മാർഗമെന്നും ജോൺസൺ പറയുന്നു.