ഐ.ടി മേഖലയിലേക്കുള്ള എച്ച്1-ബി വീസ അമേരിക്ക നിറുത്തിയതാണ് കഴിഞ്ഞവാരത്തെ മുഖ്യ വാർത്ത. ഡിസംബർ വരെയാണ് ഡൊണാൾഡ് ട്രംപ് വീസ തടഞ്ഞത്. അമേരിക്കയിൽ തൊഴിൽ തേടുന്ന ഇന്ത്യക്കാരെ നിരാശപ്പെടുത്തുന്ന തീരുമാനമാണിത്. എന്നാൽ,​ ഉത്തരവ് കാര്യമായ ചലനമുണ്ടാക്കില്ലെന്നാണ് ഇന്ത്യൻ ഐ.ടി കമ്പനികളുടെ വാദം. കാരണം,​ ട്രംപിന്റെ കടുത്ത നിയന്ത്രണങ്ങളെ തുടർന്ന് 2017 മുതൽ തന്നെ എച്ച്1-ബി വീസ അപേക്ഷകൾ കമ്പനികൾ കുറച്ചിരുന്നു.

ടി.സി.എസ്.,​ ഇൻഫോസിസ്,​ വിപ്രോ,​ എച്ച്.സി.എൽ ടെക്‌നോളജീസ് തുടങ്ങിയവ വീസ അപേക്ഷകൾ 2018-19ൽ 50-60 ശതമാനം കുറച്ചിരുന്നു. ഐ.ടി മേഖലയിൽ ഇപ്പോൾ എച്ച്1-ബി - പ്രാദേശിക ജീവനക്കാർ അനുപാതം 40-60 ശതമാനം എന്ന ക്രമത്തിലാണ്. കമ്പനികൾ മറ്റു നാടുകളിലെ സാന്നിദ്ധ്യം ഉയർത്താൻ ശ്രമിക്കുന്നതിനാൽ ഇന്ത്യൻ ഐ.ടി സേവനങ്ങളെ സമീപഭാവിയിൽ ഈ പ്രശ്‌നം ബാധിക്കില്ലെന്ന് വിലയിരുത്തപ്പെടുന്നു.

മാർച്ചിലെ ഇടിവിനും മേയിലെ കനത്ത ചാഞ്ചാട്ടത്തിനും ശേഷം ഓഹരി വിപണി കുതിപ്പ് തുടരുകയാണ്. വിപണിയിലെ ലാഭത്തിന്റെ വലിയപങ്കും ഏതാനും സെറ്ര് ഓഹരികളിൽ നിന്നാണെന്നുള്ള കാഴ്‌ചപ്പാട് പലർക്കുമുണ്ട്. എന്നാൽ,​ ഇതു ശരിയാണെന്ന് പറയാനാവില്ല. കഴിഞ്ഞ മൂന്നുമാസമായി 40-50 ശതമാനം ലാഭം നൽകുന് ചെറുകിട-ഇടത്തരം ഓഹരികൾ വിപണിയിൽ സ്ഥിരതയോടെ നിൽക്കുന്നുണ്ട്. ഈ പ്രവണത നിലനിറുത്തുക വെല്ലുവിളിയാണ്. ഒരുമാസത്തെ ഇടവേളയ്ക്ക് ശേഷം വിദേശ നിക്ഷേപത്തിലുണ്ടായ ഉണർവാണ് നിലവിലെ കുതിപ്പിന് കാരണം.

വിപണിയിൽ സമ്മിശ്ര പ്രതികരണം തുടരാനാണ് സാദ്ധ്യത. നിഫ്‌റ്രി 50ൽ 9,​500നും 10,​500നും ഇടയിലായിരിക്കും ഇടപാടുകൾ. സാങ്കേതികമായി വിശകലനം ചെയ്യുമ്പോൾ കൂടിയനില 10,​900 ആയേക്കാം. താഴേക്കുള്ള അടുത്ത ലെവലിൽ സപ്പോർട്ട് ഒന്ന് 10,​050 ആയിരിക്കും; രണ്ടാമത്തേത് 9,​800. ഇന്നത്തെ നിലയിൽ ഇടപാടുകാർക്ക് ലാഭം നേടാനാകും. ഫാർമ,​ കെമിക്കൽ,​ ഐ.ടി,​ എഫ്.എം.സി.ജി എന്നീ ഓഹരികളിൽ ആയിരിക്കണം ദീർഘകാല നിക്ഷേപകർ ശ്രദ്ധിക്കേണ്ടത്.

നിഫ്‌റ്റിക്ക് 2021-22ൽ 15 ശതമാനത്തിലേരെ വളർച്ചയാണ് നേരത്തേ പ്രവചിച്ചിരുന്നത്. എന്നാൽ,​ 2021ൽ പത്തു ശതമാനം താഴേക്ക് പോകുമെന്നാണ് പുതിയ വിലയിരുത്തൽ. 2022ൽ30 ശതമാനം വളർച്ചയും പ്രതീക്ഷിക്കുന്നു. ആരോഗ്യരംഗത്തെ തിരിച്ചുവരവും ശക്തമായ സാമ്പത്തിക പിന്തുണയുമാണ് ഇതിന്റെ കാരണങ്ങൾ.

(ജിയോജിത് ഫിനാൻഷ്യൽ സർവീസസിന്റെ ഗവേഷണ വിഭാഗം മേധാവിയാണ് ലേഖകൻ)​