കോപ്പൻഹേഗൻ: ഡെന്മാർക്ക് പ്രധാനമന്ത്രി മെറ്റി ഫെഡറിക്‌സൺ തന്റെ വിവാഹം മാറ്റിവയ്ക്കേണ്ടി വരുന്നത്, ഇത് മൂന്നാം തവണ. കൊവിഡ് മൂലം വിവാഹം മാറ്റിവയ്ക്കുന്നത് ഇപ്പോൾ സാധാരണമാണ്. പക്ഷേ മെറ്റി ഇത്തവണ വിവാഹം നീട്ടിവെച്ചത് കൊവിഡിനെ പേടിച്ചല്ല. രാജ്യതാത്പര്യം സംരക്ഷിക്കാനാണ്.

മെറ്റിയും കാമുകൻ ബോയും തമ്മിലുള്ള വിവാഹം മുമ്പ് രണ്ട് തവണ മുടങ്ങിയിരുന്നു. അന്ന് വില്ലനായത്‌ കൊവിഡായിരുന്നു. കൊവിഡ് വ്യാപിച്ചതോടെ, അത് കുറയാൻ കാത്തുനിൽക്കാതെ പ്രധാനമന്ത്രി വിവാഹം കഴിക്കാൻ തീരുമാനിച്ചു. എന്നാൽ, ഇത്തവണ പ്രതിനായകനായത് യൂറോപ്യൻ യൂണിയൻ ഉച്ചകോടിയാണ്‌. വിവാഹ ദിവസം തന്നെ ഉച്ചകോടി വന്നെത്തി. പക്ഷേ പ്രധാനമന്ത്രിക്ക് സ്വന്തം വിവാഹത്തേക്കാളും പ്രാധാന്യം സ്വന്തം രാജ്യമായിരുന്നു.

അതുകൊണ്ട് തന്നെ അവർ കാമുകന്റെ ചിത്രം സാമൂഹിക മാദ്ധ്യമങ്ങളിൽ പോസ്റ്റ് ചെയ്തുകൊണ്ട് ഇങ്ങനെ കുറിച്ചു. ''ഈ വിശിഷ്ട വ്യക്തിയെ വിവാഹം കഴിക്കാനായി ഞാൻ കാത്തിരിക്കുകയാണ്. പക്ഷേ അത് അത്ര എളുപ്പമുള്ള കാര്യമല്ല. കാരണം ഞങ്ങൾ വിവാഹിതരാകാൻ തീരുമാനിച്ച ജൂലായിലെ ആ ശനിയാഴ്ച തന്നെ ബ്രസൽസിൽ വച്ച് ഒരു കൗൺസിൽ യോഗത്തിൽ പങ്കെടുക്കാൻ ക്ഷണം വന്നു. ഞാൻ എന്റെ ജോലി ചെയ്യാനും രാജ്യതാത്പര്യങ്ങളെ സംരക്ഷിക്കാനും തീരുമാനിച്ചു. അതുകൊണ്ട് തന്നെ വിവാഹം വീണ്ടും നീട്ടിവയ്ക്കുകയാണ്. വൈകാതെ ഞങ്ങൾക്ക് വിവാഹിതരാകാൻ സാധിക്കുമെന്നാണ്‌ പ്രതീക്ഷിക്കുന്നത്. ബോയോട് 'യെസ്‌' പറയാൻ ഞാൻ കാത്തിരിക്കുകയാണ്.''

27 രാജ്യങ്ങളുടെ തലവന്മാർ പങ്കെടുക്കുന്ന ഇ.യു ഉച്ചകോടി ജൂലായ് 17,18 തീയതികളിലായാണ് നടക്കുന്നത്. മെറ്റി വിവാഹിതയാകാൻ തീരുമാനിച്ചതാകട്ടെ , ജൂലായ് 18നും.