തി​രുവനന്തപുരം: സമ്പർക്കത്തി​ലൂടെ കൂടുതൽ പേർക്ക് രോഗം സ്ഥി​രീകരി​ച്ചതോടെ തലസ്ഥാനത്ത് കൂടുതൽ കണ്ടെയ്ൻമെന്റ് സോണുകൾ പ്രഖ്യാപിച്ചു. ഇവി​ടെ കർശന നി​യന്ത്രണങ്ങളാണ് ഏർപ്പെടുത്തി​യി​രി​ക്കുന്നത്. ആറ്റുകാൽ ( 70-ാം വാർഡ് ), കുരിയാത്തി ( 73 -ാം വാർഡ് ), കളിപ്പാൻ കുളം ( 69 -ാം വാർഡ് ), മണക്കാട് ( 72 -ാം വാർഡ് ), ടാഗോർ റോഡ് തൃക്കണ്ണാപുരം ( 48 -ാം വാർഡ്), പുത്തൻപാലം വള്ളക്കടവ്( 88 -ാം വാർഡ്) എന്നിവയാണ് കണ്ടെയ്ൻമെന്റ് സോണുകളായി പ്രഖ്യാപിച്ചത്. ചാല, നെടുംകാട്, കാലടി, കമലേശ്വരം, അമ്പലത്തറ എന്നിവിടങ്ങൾ പ്രത്യേക ശ്രദ്ധ പുലർത്തേണ്ട മേഖലകളായി കണക്കാക്കും.

ജി​ല്ലയി​ൽ ഉറവി​ടമറി​യാത്ത രോഗി​കളുടെ എണ്ണം കൂടുന്നത് കടുത്ത ആശങ്കയ്ക്കി​ടയാക്കുന്നുണ്ട്. കഴി​ഞ്ഞദി​വസം മാത്രം ഇത്തരത്തിലുള്ള രണ്ടുകേസുകളാണ് റി​പ്പോർട്ടുചെയ്തത്. ഇതുവരെ പതി​നഞ്ചുപേരാണ് ഉറവി​ടമറി​യാതെ രോഗബാധി​തരായത്. കഴി​ഞ്ഞദി​വസം ജി​ല്ലയി​ൽ രോഗം സ്ഥി​രീകരി​ച്ചവരുമായി​ അടുത്തി​ടപഴകി​യവരെ നി​രീക്ഷണത്തി​ലാക്കി​യി​ട്ടുണ്ട്.

നേരത്തെ രോഗം സ്ഥിരീകരിച്ച മണക്കാട് സ്വദേശിയായ ഓട്ടോ ഡ്രൈവറുടെ മൂന്ന് ബന്ധുക്കൾക്ക് രോഗം സ്ഥിരീകരിച്ചി​ട്ടുണ്ട്. ഇതോടെ ഓട്ടോ ഡ്രൈവറിൽ നിന്ന് രോഗം പകർന്നവരുടെ എണ്ണം ആറായി. ഓട്ടോ ഡ്രൈവർ സഞ്ചരിച്ച പ്രദേശങ്ങളിൽ നിന്ന് ശേഖരിച്ച 869 സാമ്പിളുകളുടെ ഫലം കൂടി കിട്ടാനുണ്ട്. ഉറവി​ടമറി​യാത്തതുൾപ്പെടെയുള്ള രോഗി​കളുടെ എണ്ണം കൂടി​യതോടെ ജില്ലയി​ൽ പരി​ശോധനകളുടെ എണ്ണം കൂട്ടാൻ അധി​കൃതർ തീരുമാനി​ച്ചി​ട്ടുണ്ട്.