കൊച്ചി: സംസ്ഥാനത്ത് സ്വർണവില ഇന്നലെ വൻ കുതിപ്പുമായി എക്കാലത്തെയും ഉയരത്തിലെത്തി. ഇന്നലെ രണ്ടുവട്ടമായി മൊത്തം 400 രൂപ വർദ്ധിച്ച് പവൻവില 35,​920 രൂപയായി. 50 രൂപ മുന്നേറി 4,​490 രൂപയാണ് ഗ്രാം വില. ആഗോള വിപണിയുടെ ചുവടുപിടിച്ചാണ് സ്വർണത്തിന്റെ മുന്നേറ്രം.

കൊവിഡ് പ്രതിസന്ധിമൂലം ആഗോളതലത്തിൽ ഓഹരി-കടപ്പത്ര വിപണി ഇനിയും സജീവമായിട്ടില്ല. നിക്ഷേപകർ,​ സുരക്ഷിത നിക്ഷേപമെന്ന നിലയിൽ സ്വർണത്തിലേക്ക് കൂട്ടത്തോടെ ചേക്കേറുകയാണ്. ഇന്ത്യ-ചൈന അതിർത്തി തർക്കം രൂക്ഷമായതോടെ ഉയർന്ന യുദ്ധഭീതി,​ അമേരിക്ക-ചൈന തർക്കം,​ അമേരിക്കൻ സമ്പദ്‌സ്ഥിതി സംബന്ധിച്ച ആശങ്ക എന്നിവയും സ്വർണത്തോടുള്ള നിക്ഷേപക താത്പര്യം ഉയർത്തിയിട്ടുണ്ട്. മേയിൽ മാത്രം ഇന്ത്യയിലെ ഗോൾഡ് ഇ.ടി.എഫ് ഫണ്ടുകളിലേക്ക് ഒഴുകിയത് 815 കോടി രൂപയാണ്. കഴിഞ്ഞ ആഗസ്‌റ്ര് മുതൽ ഇതുവരെ 3,​300 കോടി രൂപയും.

രാജ്യാന്തരവില ഇന്നലെ ഔൺസിന് 1.01 ഡോളർ ഉയർന്ന് 1,771.23 ഡോളറിലെത്തി. കഴിഞ്ഞ ഏഴരവർഷത്തെ ഏറ്റവും ഉയർന്ന വിലയാണിത്. നിലവിലെ ട്രെൻഡ് തുടരുമെന്നും കേരളത്തിൽ ഗ്രാം വില വൈകാതെ 4,​500 രൂപയും പവൻവില 36,​000 രൂപയും കടക്കുമെന്നാണ് വിപണിയുടെ വിലയിരുത്തൽ.

പുതിയ ഉയരം

പവൻ വില : ₹35,​920 (+400)​

ഗ്രാം വില : ₹4,​490 (+50)​

₹40,​000

സംസ്ഥാനത്ത് ഇപ്പോൾ മൂന്നു ശതമാനം ജി.എസ്.ടി,​ 0.25 സെസ്,​ കുറഞ്ഞത് 5% പണിക്കൂലി എന്നിവ കൂടിച്ചേർത്ത് ഒരു പവൻ സ്വർണാഭരണം വാങ്ങാൻ കുറഞ്ഞത് 40,​000 രൂപ കൊടുക്കേണ്ട സ്ഥിതിയാണ്.

₹6,​920

പവൻ വിലയിൽ 2020ൽ ഇതുവരെ വർദ്ധിച്ച തുക.