ലണ്ടൻ: ഇരട്ട ഗർഭപാത്രമുള്ള 28കാരിയുടെ ഓരോ ഗർഭപാത്രത്തിലും വളരുന്നത് ഇരട്ടക്കുട്ടികൾ. ലണ്ടനിലെ ബ്രയിൻട്രീ സ്വദേശിയായ കെല്ലി ഫെയർഹസ്റ്റിനാണ് അപൂർവങ്ങളിൽ അപൂർവമായ ഈ ഗർഭധാരണം സംഭവിച്ചത്.

ഗർഭിണിയായി 12 ആഴ്ചകൾ പിന്നിട്ടതിനെ തുടർന്ന് നടത്തിയ സ്കാനിംഗിലാണ് തനിക്ക് ഇരട്ട ഗർഭപാത്രങ്ങളുള്ള വിഷയവും ഓരോ ഗർഭപാത്രത്തിലും ഇരട്ടക്കുട്ടികൾ വളരുന്ന വാർത്തയും കെല്ലി അറിയുന്നത്.

കെല്ലിക്ക് മൂന്നും നാലും വയസുളള രണ്ടു പെൺകുട്ടികൾ ഉണ്ട്. 'രണ്ടാമത്തെ കുട്ടി ഉണ്ടായ സമയത്ത് എനിക്ക് ബൈകോർണ്യൂവെറ്റ്‌ യൂട്രസ് ഉണ്ടാകാമെന്ന് അവർ പറഞ്ഞിരുന്നു. അതായത് പൂർണമായി രൂപപ്പെടാത്ത ഒന്ന്. എന്നാൽ ഇത്തവണ സ്കാനിംഗിനായി പോയപ്പോഴാണ് ഇക്കാര്യത്തിൽ കൂടുതൽ വ്യക്തത വന്നത്. ഞാൻ ശരിക്കും അത്ഭുതപ്പെട്ടുപോയി.' കെല്ലി പറയുന്നു. കുഞ്ഞുങ്ങളെ സിസേറിയനിലൂടെ പുറത്തെടുക്കാനാണ് ഡോക്ടർമാരുടെ തീരുമാനം.