ന്യൂഡൽഹി : കൊവിഡിന് മൂന്നു ലക്ഷണങ്ങൾ കൂടി കണ്ടെത്തി. മൂക്കടപ്പ് അല്ലെങ്കിൽ മൂക്കൊലിപ്പ്, ഓക്കാനം, അതിസാരം എന്നിവയാണ് പുതിയ രോഗ ലക്ഷണങ്ങളെന്ന് യു.എസ് സെന്റർ ഫോർ ഡിസീസസ് പ്രിവെൻഷൻ (സി.ഡി.സി)അറിയിച്ചു.

ഇതോടെ രോഗലക്ഷണങ്ങളുടെ എണ്ണം 12 ആയി. പനി, കുളിര്, ചുമ, ശ്വസനത്തിനുള്ള ബുദ്ധിമുട്ട്, ക്ഷീണം, ശരീര വേദന, തലവേദന, രുചിയും മണവും നഷ്ടമാകുക, തൊണ്ട വേദന എന്നിവയാണ് പട്ടികയിൽ നേരത്തേ ഉണ്ടായിരുന്ന രോഗലക്ഷണങ്ങൾ. എന്നാൽ എപ്പോഴും ഇവ കൊവിഡ് ലക്ഷണങ്ങളായി കണക്കാക്കാൻ കഴിയില്ലെന്ന് സിഡിസിയുടെ വെബ്‌സൈറ്റിൽ പറഞ്ഞിട്ടുണ്ട്.

ഓരോ കേസുകളിലും രോഗലക്ഷണങ്ങൾ വ്യത്യസ്തമായിരിക്കും. രണ്ട് മുതൽ 14 ദിവസത്തിനുള്ളിലാണ് രോഗലക്ഷണങ്ങൾ പ്രകടമാകുക. ഇതുസംബന്ധിച്ച് കൂടുതൽ വിവരങ്ങൾ പഠന വിധേയമാക്കിക്കൊണ്ടിരിക്കുക യാണെന്നും വെബ്‌സൈറ്റിൽ പറയുന്നു.