മലപ്പുറം: മനോഹര ചരിത്രമുള്ള നല്ല നാടാണ് മലപ്പുറമെന്ന് മുൻ കേന്ദ്രമന്ത്രി മേനക ഗാന്ധി. താൻ ഉദ്ദേശിച്ചത് മൃഗങ്ങളോടുള്ള ക്രൂരതയെക്കുറിച്ചാണ്. ഇതിനെ സാമുദായിക വിഷയമായി മാറ്റാൻ ആഗ്രഹിച്ചിട്ടില്ല. യഥാർത്ഥ പ്രശ്നം എല്ലാവരും മനസ്സിലാക്കണമെന്നും മേനക തന്റെ ഇ-മെയിൽ കത്തിൽ പറഞ്ഞു.

പാലക്കാട് മണ്ണാർക്കാട്ട് ആന കൊല്ലപ്പെട്ട സംഭവത്തിൽ മേനക ഗാന്ധി മലപ്പുറത്തെ അധിക്ഷേപിച്ചതിൽ പ്രതിഷേധിച്ച് മൊറയൂർ പഞ്ചായത്ത് യൂത്ത് ലീഗ് അയച്ച കത്തിന് മറുപടിയായാണ് ഇ-മെയിൽ കത്ത്. മലപ്പുറത്തിന്റെ സാഹോദര്യം വിവരിച്ചും ജില്ലയെ നേരിട്ടറിയാൻ ക്ഷണിച്ചുമാണ് മേനകയ്ക്ക് കത്തയച്ചത്. സംസ്ഥാന വനം മന്ത്രി കെ.രാജു, വനം വകുപ്പ് മേധാവി, വന്യജീവി സംരക്ഷണവകുപ്പ് ഉദ്യോഗസ്ഥർ തുടങ്ങിയവർ പറഞ്ഞതനുസരിച്ചാണ് ആന കൊല്ലപ്പെട്ടത് മലപ്പുറത്താണെന്ന് താൻ പറഞ്ഞതെന്ന് മേനക ഗാന്ധി വിശദീകരിക്കുന്നു. എന്നാൽ, മലപ്പുറത്തെ അവഹേളിച്ചു കൊണ്ടുള്ള ട്വീറ്റ് തിരുത്തണമെന്നാവശ്യപ്പെട്ട് യൂത്ത് ലീഗ് വീണ്ടും കത്തയച്ചിട്ടുണ്ട്.