നിലമ്പൂർ: കാട്ടിൽ ഷെഡ്ഡൊരുക്കി ഓൺലൈൻ പഠനത്തിനായി ടെലിവിഷൻ കാത്തിരുന്ന മുണ്ടേരി ഇരുട്ടുകുത്തി കോളനിയിലെ ആദിവാസികുട്ടികൾക്ക് ടെലിവിഷനൊപ്പം പ്രഭാത ഭക്ഷണവുമൊരുക്കി സംസ്​ക്കാരസാഹിതി. ചെയർമാൻ ആര്യാടൻ ഷൗക്കത്തിന്റെ നേതൃത്വത്തിലാണ് പ്രവർത്തകർ ടെലിവിഷനും ഡി.ടി.എച്ചും നൽകിയത്. കഴിഞ്ഞ പ്രളയത്തിൽ മുണ്ടേരി വനത്തിലെ കോളനിയിലേക്കുള്ള ചാലിയാറിലെ ഇരുട്ടുകുത്തിപ്പാലം ഒലിച്ചു പോയതിനാൽ ചങ്ങാടത്തിലാണ് ടി.വിയുമായെത്തിയത്. കോളനിയിലെ കുട്ടികളുടെ പ്രഭാത ഭക്ഷണവും സംസ്​ക്കാര സാഹിതി ഏറ്റെടുത്തതായി ആര്യാടൻ ഷൗക്കത്ത് അറിയിച്ചു. കോളനിക്കാർക്കെല്ലാം മൂന്നു ജോഡി മാസ്​ക്കുകളും വിതരണം ചെയ്തു. പഞ്ചായത്തംഗം കെ. സറഫുന്നീസ, ജൂഡി തോമസ്, കെ. രമണിക്കുട്ടി, ലക്ഷ്മി ഏട്ടപ്പാറ, മനോജ് ചെന്നാംപ്പിള്ളി, ജോയ് കൂനംമാവുങ്കൽ, അബ്ദു കുന്നുമ്മൽ തുടങ്ങിയവർ പ്രസംഗിച്ചു.