മലപ്പുറം: കേന്ദ്ര-സംസ്ഥാന സർക്കാരുകളുടെ വിവിധ ആനൂകുല്യങ്ങൾക്ക് അക്ഷയ കേന്ദ്രങ്ങളിലൂടെ അപേക്ഷിക്കണമെന്ന സാമൂഹിക മാദ്ധ്യമങ്ങളിലൂടെയുള്ള വ്യാജപ്രചാരണങ്ങൾക്കെതിരെ അക്ഷയ അധികൃതർ രംഗത്ത്. ഇത്തരം പ്രചാരണങ്ങളിൽ ജനങ്ങൾ വഞ്ചിതരാകരുതെന്ന് അക്ഷയ ജില്ലാ പ്രൊജക്ട് മാനേജർ പി.ജി. ഗോകുൽ അറിയിച്ചു. സർക്കാരിന്റെയും ഐ.ടി മിഷന്റെയും അക്ഷയയുടെയും ലോഗോ പതിച്ചുള്ള വ്യാജ അറിയിപ്പുകളാണ് പ്രചരിക്കുന്നത്. ബിരുദ വിദ്യാർത്ഥികൾക്ക് 15,000 രൂപയുടെ സ്‌കോളർഷിപ്പ്, ലോക്ക് ഡൗൺ കാലത്ത് വ്യാപാരികൾക്ക് സംസ്ഥാന സർക്കാരിന്റെ സഹായ ധനം, ദിവസ വേതന തൊഴിലാളികളെയും കുടിയേറ്റ തൊഴിലാളികളെയും സാമ്പത്തികമായി സഹായിക്കാൻ കോവിഡ് 19 സപ്പോർട്ട് പ്രോഗ്രാം എന്നിങ്ങനെയുള്ള പദ്ധതികൾക്ക് അക്ഷയകേന്ദ്രങ്ങളിലൂടെ അപേക്ഷിക്കാമെന്ന വ്യാജ അറിയിപ്പുകളാണ് സോഷ്യൽ മീഡിയയിലൂടെ പ്രചരിക്കുന്നത്. Buddyts4udy.com, examplanner.in, government.job.in, tthp://pradhamsshiksshyojana.com തുടങ്ങിയ വ്യാജ വെബ്സൈറ്റുകൾ വഴിയാണ് പ്രചാരണം.
വ്യാജപ്രചാരണങ്ങൾ വ്യാപിച്ചതോടെ ജില്ലയിലെ അക്ഷയകേന്ദ്രങ്ങളിൽ ആനുകൂല്യങ്ങൾക്കായുള്ള അപേക്ഷകരുടെ തിരക്ക് വർദ്ധിച്ചിട്ടുണ്ട്. അക്ഷയയിലൂടെ നൽകുന്ന ആനുകൂല്യങ്ങളുടെ മുഴുവൻ വിവരങ്ങളും അക്ഷയയുടെ സംസ്ഥാന ഓഫീസ്, ജില്ലാ ഓഫീസ് എന്നിവിടങ്ങളിൽ പ്രസിദ്ധീകരിക്കുമെന്ന് ജില്ലാ പ്രൊജക്ട് മാനേജർ അറിയിച്ചു.