ചെങ്ങന്നൂർ : എസ്.എൻ.ഡി.പിയോഗം ചെങ്ങന്നൂർ യൂണിയന്റെ നേതൃത്വത്തിൽ ശ്രീനാരായണഗുരുദേവന്റെ ശുദ്ധിപഞ്ചകം പുസ്തകം വ്യാഖ്യാന സഹിതം പ്രസിദ്ധീകരിക്കും. ശുചിത്വത്തിന് പ്രാധാന്യമേറിവരുന്ന കൊവിഡ് കാലഘട്ടത്തിൽ ഇൗ പുസ്തകത്തിന് പ്രസക്തിയേറെയാണ്. എത്തരത്തിലായിരിക്കണം ശുചിത്വം പാലിക്കേണ്ടതെന്നും ശരീര ശുദ്ധിയും, വാക്ക്, മനസ്സ്, ഇന്ദ്രിയ, ഗൃഹ ശുദ്ധികളും പരിസര ശുദ്ധിയും എങ്ങനെയായിരിക്കണമെന്നും വ്യക്തമാക്കുന്നു. കോവിഡ്19 നെ പ്രതിരോധിക്കുവാനുള്ള ആധുനിക മാർഗങ്ങൾ കൂടി ഉൾപ്പെടുത്തിക്കൊണ്ട് പ്രസിദ്ധീകരിക്കുന്ന പുസ്തകം യൂണിയൻ അതിർത്തിയിലെ മുഴുവൻ ഭവനങ്ങളിലും സൗജന്യമായി വിതരണം ചെയ്യും. മാസ്‌കുകളും നൽകും. കോവിഡ് പ്രതിരോധ പ്രവർത്തനങ്ങളുടെ ഭാഗമായി ഗൃഹശുചീകരണവും പരിസര ശുചീകരണവും ഗുരുക്ഷേത്ര പരിസര ശുചീകരണവും നടത്തും. പഞ്ചശുദ്ധി പുസ്തക പ്രകാശനം യോഗം ജനറൽ സെക്രട്ടറി വെള്ളാപ്പള്ളി നടേശൻ നിർവഹിക്കും. കൊവിഡ് പ്രതിരോധ പ്രവർത്തനങ്ങൾ പത്തിന് ആരംഭിക്കുമെന്ന് യൂണിയൻ ചെയർമാൻ ഡോ.എ.വി.ആനന്ദരാജ്, വൈസ് ചെയർമാൻ ഗിരീഷ് കോനാട്ട്, കൺവീനർ ബൈജു അറുകുഴി, യൂണിയൻ അഡ്മിനിസ്‌ട്രേറ്റീവ് കമ്മറ്റി അംഗം എൻ.വിനയചന്ദ്രൻ എന്നിവർ അറിയിച്ചു.