പത്തനംതിട്ട- കുറ്റിക്കുരുമുളക് നട്ടോളൂ, വീട്ടാവശ്യത്തിനുള്ള കുരുമുളക് മുറ്റത്തുനിന്ന് കിട്ടും. തൈകൾ പത്തനംതിട്ട ജില്ലാ കൃഷി വിജ്ഞാന കേന്ദ്രത്തിൽ സുലഭം. രണ്ടോ, മൂന്നോ ചെടികൾ മതി വർഷം മുഴുവൻ ആവശ്യമായ കുരുമുളക് ലഭിക്കും. സാധാരണ താങ്ങുകാലുകളിൽ വളരുന്ന കുരുമുളകിന്റെ കണ്ണിത്തല വേര് പിടിപ്പിച്ച് നടുന്നതാണ് കുറ്റിക്കുരുമുളക് ചെടി. ഇത് ഗ്രോബാഗുകളിലോ ചട്ടികളിലോ വളർത്താം.

നടുന്നതിനായി 10 കിലോ നടീൽ മിശ്രിതം (മേൽ മണ്ണ്, മണൽ, ചാണകപ്പൊടി എന്നിവ തുല്യ അനുപാതത്തിൽ കൂട്ടിക്കലർത്തിയത്) നിറച്ച ചട്ടിയിലോ ഗ്രോബാഗിലോ നടാം. ദിവസേന രണ്ടുനേരം മിതമായ തോതിൽ മാത്രം നനയ്ക്കുക. ചട്ടികൾ അൻപത് ശതമാനം തണലിൽ വയ്ക്കാൻ പ്രത്യേകം ശ്രദ്ധിക്കണം. വർഷത്തിലൊരിക്കൽ 100 ഗ്രം ഉണങ്ങിയ ചാണകപ്പൊടി / മണ്ണിര കമ്പോസ്റ്റ് എന്നിവ ചേർക്കുക. രണ്ടുമാസത്തിൽ ഒരിക്കൽ 3 ഗ്രാം വീതം ഫാക്ടംഫോസും, പൊട്ടാഷും ഇടുക. വർഷത്തിൽ 50 ഗ്രം കുമ്മായം അല്ലെങ്കിൽ ഡോളോമൈറ്റ് കൊടുക്കുന്നത് നല്ലതാണ്. വർഷത്തിൽ രണ്ട് തവണ (ജൂൺ /സെപ്തംബർ മാസത്തിൽ) കോപ്പർ ഓക്സിക്ലോറൈഡ് 2 ഗ്രാം 1 ലിറ്റർ വെള്ളത്തിൽ എന്ന തോതിൽ കലർത്തി ഇലകളിൽ തളിക്കുകയും ചുവട്ടിൽ ഒഴിച്ചുകൊടുക്കുകയും ചെയ്യണം. അല്ലെങ്കിൽ സ്യൂഡോമോണസ് 20 ഗ്രാം 1 ലിറ്റർ എന്ന തോതിലോ തളിക്കണം.
ചെടിയുടെ വളർച്ച അനുസരിച്ച് ഒരു ചെടിയിൽ നിന്ന് ഏകദേശം 500 ഗ്രാം മുതൽ 1.5 കിലോ വരെ പച്ചക്കുരുമുളക് ലഭിക്കും.
തൈകൾ വേണ്ടവർ പത്തനംതിട്ട ജില്ലാ കൃഷി വിജ്ഞാന കേന്ദ്രവുമായി ബന്ധപ്പെടണം. ഫോൺ 0469 2661821.
------------

വില - ഒരു ചെടിക്ക് 100 രൂപ