പത്തനംതിട്ട: റാന്നി താലൂക്ക്തല ഓൺലൈൻ അദാലത്ത് 27ന് നടക്കും. ജൂലായ് നാലിനാണ് അടൂർ താലൂക്ക് അദാലത്ത്. ജില്ലാ കളക്ടർ കളക്ടറേറ്റിൽ വീഡിയോ കോൺഫറൻസിലൂടെ അക്ഷയ കേന്ദ്രങ്ങൾ മുഖേനയാണ് ജനങ്ങളുടെ പരാതികൾ കേൾക്കുന്നത്.

റാന്നി താലൂക്കിലുള്ള അപേക്ഷകർക്ക് നാളെ മുതൽ 23ന് വൈകിട്ട് അഞ്ചു വരെ റാന്നിയിലെ അക്ഷയകേന്ദ്രങ്ങളിൽ ഫോൺ മുഖേന രജിസ്റ്റർ ചെയ്യാം.

രജിസ്റ്റർ ചെയ്യുന്ന അപേക്ഷയും അപേക്ഷകന്റെ ഫോൺ നമ്പരും അക്ഷയ കേന്ദ്രം രേഖപ്പെടുത്തണം. വീഡിയോ കോൺഫറൻസിന്റെ സമയം അപേക്ഷകരുടെ ഫോണിൽ സംരംഭകൻ അറിയിക്കും. തുടർന്ന് ഓരോ പരാതിക്കാരനും തങ്ങൾക്ക് നിർദേശിച്ചിരിക്കുന്ന സമയത്ത് വീഡിയോ കോൺഫറൻസിൽ പങ്കെടുക്കുന്നതിന് അക്ഷയ കേന്ദ്രത്തിൽ എത്തണം. ജില്ലാ കളക്ടറോട് വീഡിയോ കോൺഫറൻസിലൂടെ ജനങ്ങൾ ബോധിപ്പിക്കുന്ന പരാതികൾ ഇ ആപ്ലിക്കേഷൻ വഴി സമർപ്പിക്കുന്നതിനുള്ള സൗകര്യവും അക്ഷയ കേന്ദ്രങ്ങളിലുണ്ട്.
കൊവിഡിന്റെ പശ്ചാത്തലത്തിൽ പൊതുജനപരാതിപരിഹാര അദാലത്തുകൾ ഓൺലൈനിൽ സംഘടിപ്പിക്കുന്നതിന്റെ സാദ്ധ്യത പരിശോധിക്കണമെന്ന മുഖ്യമന്ത്രിയുടെ നിർദ്ദേശത്തെ തുടർന്നാണ് ഓൺലൈൻ പരാതിപരിഹാര സംവിധാനം ഏർപ്പെടുത്തിയത്. ബന്ധപ്പെട്ട ഉദ്യോഗസ്ഥർ അവരവരുടെ ഓഫീസുകളിൽ നിന്ന് വീഡിയോ കോൺഫറൻസിൽ പങ്കെടുക്കണം.

അടൂർ താലൂക്കിലുള്ള അപേക്ഷകർക്ക് ഇൗ മാസം 22 മുതൽ 26ന് വൈകിട്ട് അഞ്ചു വരെ അടൂരിലെ അക്ഷയകേന്ദ്രങ്ങളിൽ ഫോൺ മുഖേന രജിസ്റ്റർ ചെയ്യാം.