കൊട്ടാരക്കര: സേവാഭാരതിയെന്ന ഹൈന്ദവ സംഘടനയുടെ നേതൃത്വത്തിൽ സംഘടിപ്പിച്ച ഗ്രാമവൈഭവം പദ്ധതിയുടെ ഭാഗമായി ഐഷാപോറ്റി എം.എൽ.എ വൃക്ഷത്തൈ നട്ടത് വിവാദമായി. വെള്ളിയാഴ്ച ആർ.എസ്.എസ് ജില്ലാ കാര്യവാഹക് ആർ. ദിവാകരൻ, ആരോഗ്യ ഭാരതി സംസ്ഥാന സംഘടനാ സെക്രട്ടറി സജീവൻ, സജി എന്നിവർ എം.എൽ.എയുടെ വീട്ടിലെത്തി പരിസ്ഥിതി ദിനവുമായി ബന്ധപ്പെട്ട് വീട്ടുമുറ്റത്ത് വൃക്ഷത്തൈ നടാൻ അഭ്യർത്ഥിച്ചു. എന്നും കാണുന്ന മുഖങ്ങളായതിനാൽ രാഷ്ട്രീയ ചിന്തയില്ലാതെ എം.എൽ.എ തൈ നടുകയും ചെയ്തു. അല്പ സമയത്തിനകം നവമാദ്ധ്യമങ്ങളിൽ സേവാഭാരതിയുടെ ഗ്രാമവൈഭവം പദ്ധതിയുടെ താലൂക്കുതല ഉദ്ഘാടനം സി.പി.എംകാരിയായ എം.എൽ.എ നിർവഹിക്കുന്ന ചിത്രവും വാർത്തയുമെത്തി. അതോടെ സി.പി.എമ്മിലും എം.എൽ.എയ്ക്കെതിരെ കടുത്ത വിമർശനമുണ്ടായി. യു.ഡി.എഫ് പ്രവർത്തകരാണ് നവമാദ്ധ്യമങ്ങളിൽ ചിത്രം പ്രചരിപ്പിച്ച് വലിയ തോതിൽ ചർച്ചയാക്കിയത്.