ജിംനേഷ്യത്തിലെ ഒരു യന്ത്രം തനിയെ പ്രവർത്തിക്കുന്നു. അതെങ്ങനെ സംഭവിക്കും? ഉത്തര്‍ പ്രദേശിലെ ഝാന്‍സിയില്‍ തുറസായ സ്ഥലത്ത് പ്രവർത്തിക്കുന്ന ജിമ്മിലാണ് ഈ അത്ഭുത പ്രവർത്തി. ജിമ്മിലെ ഷോള്‍ഡര്‍ പ്രസ് യന്ത്രമാണ് തനിയെ പ്രവർത്തിച്ചുകൊണ്ടിരുന്നത്. ഫിറ്റ്സ് പ്രേമിയായ പ്രേതമാണോ ഇതിന് പിന്നിലെന്ന ചർച്ചയും സോഷ്യൽ മീഡിയയിൽ പ്രചരിച്ചു.

സംഭവത്തിന്‍റെ വീഡിയോ വൈറലായതോടെ പൊലീസ് അന്വേഷിക്കാനായി എത്തി. പൊലീസ് എത്തിയപ്പോഴും യന്ത്രം നിർത്താതെ പ്രവർത്തിച്ചുകൊണ്ടിരുന്നു. ഇതുകൊണ്ട് പൊലീസ് സംഘം ചെറുതായൊന്ന് ഞെട്ടി. എന്നാൽ രണ്ടു പൊലീസുകാർ യന്ത്രത്തിന്‍റെ സമീപമെത്തി പരിശോധിച്ചതോടെ കള്ളി വെളിച്ചത്തായി. പ്രേതവും ഭൂതവുമൊന്നുമല്ലായിരുന്നു. ജിമ്മിൽ കടന്നുകൂടിയ ആരോ യന്ത്രത്തിന് പരിധിയിൽ കൂടുതൽ ഗ്രീസ് ഇട്ടുനൽകിയതോടെയാണ് അത് നിർത്താതെ പ്രവർത്തിക്കാൻ തുടങ്ങിയത്.

സാമൂഹ്യവിരുദ്ധന്മാരായിരിക്കും ഇങ്ങനെ ചെയ്തതെന്നാണ് പൊലീസ് പറയുന്നത്. യന്ത്രം പൊലീസ് പരിശോധിക്കുന്നതിന്റെ വീഡിയോ ട്വിറ്ററില്‍ ഝാന്‍സി പൊലീസ് ട്വീറ്റ് ചെയ്തിട്ടുമുണ്ട്. 'ആരോ മനപ്പൂര്‍വ്വം പ്രശ്നമുണ്ടാക്കാന്‍ അമിതമായി ഗ്രീസ് പുരട്ടിയ ശേഷം യന്ത്രത്തിന്റെ വീഡിയോ എടുത്ത് പ്രചരിപ്പിച്ചതാണ്. കുറ്റവാളിയെ കണ്ടെത്താനുള്ള അന്വേഷണം പുരോഗമിക്കുകയാണ്'- ഝാന്‍സി പൊലീസ് അറിയിച്ചു.

Fitness freak ghost 👻?@jhansipolice got a tip off about an open gym being used by ghosts!Team laid seige & soon found t real ghosts-Some mischievous person made video of moving swing & shared on #socialmedia. Miscreants will b hosted in a ‘haunted’ lockup soon #NoHostForGhost pic.twitter.com/JUaYt4IJMS

— RAHUL SRIVASTAV (@upcoprahul) June 12, 2020