മലയാളികളുടെ പ്രിയ നടൻ സുരേഷ് ഗോപിയെക്കുറിച്ചുള്ള ഒരു കുറിപ്പ് കൂടി സോഷ്യൽ മീഡിയയിൽ വൈറലാകുകയാണ്. കൊവിഡ് കാലത്ത് അമേരിക്കയിൽ അകപ്പെട്ട് പോയ മലയാളി കുടുംബത്തിനാണ് ഇത്തവണ സുരേഷ് ഗോപി എംപിയുടെ സഹായം ലഭിച്ചത്. നിയമത്തിന്റെ പല നൂലാമാലകളിൽ പെട്ട് നാട്ടിലേക്ക് മടങ്ങി എത്താനാകാതെ നിന്ന മലയാളി കുടുംബത്തെ സുരേഷ് ഗോപിയുടെ ഇടപെടലിലൂടെ കേന്ദ്രത്തിൽ നിന്നും പ്രത്യേക ഓർഡിനൻസ് പുറത്തിറക്കി നാട്ടിൽ എത്തിക്കുകയാണ് ചെയ്തത്. അമേരിക്കൻ മലയാളിയായ റോയ് മാത്യു ഫേസ്ബുക്കിൽ പങ്കുവെച്ച കുറിപ്പിലാണ് ഇക്കാര്യം വെളിപ്പെടുത്തിയത്.

റോയ് മാത്യുവിന്റെ കുറിപ്പ്

കാലിഫോർണിയയിലെ ലോസാഞ്ചൽസിൽ, സ്റ്റുഡന്റ് വിസയിൽ വന്ന് ജോലിയും പഠനവും ആയി ജീവിച്ചുകൊണ്ടിരുന്ന മലയാളി കുടുംബത്തിന്, തിരിച്ചു നാട്ടിലേക്ക് പോകുവാൻ കഴിയാതെ നിയമത്തിന്റെ നൂലാമാലകളിൽ ജീവിതം ദുരിതപൂർണ്ണമായപ്പോൾ, സഹായഹസ്തവുമായി കൂടെപ്പിറപ്പിനെപോലെ കൂടെ നിന്ന ബഹുമാന്യ എം.പി സുരേഷ് ഗോപിക്ക് അഭിനന്ദനങ്ങളുടെ പൂച്ചെണ്ടുകൾ.

അമേരിക്കയിൽ ജനിച്ച, അമേരിക്കൻ പാസ്സ്‌പോർട്ടിന് ഉടമയായ കുഞ്ഞിന് ഇന്ത്യയിലേക്ക് പോകുവാനുള്ള വിസ ലഭിക്കുന്നത് അസാധ്യമായി വന്നപ്പോൾ, ഇന്ത്യൻ ഹോം മിനിസ്റ്റർ ബഹുമാന്യ അമിത് ഷായുമായി ബന്ധപ്പെട്ട് മണിക്കൂറുകൾക്കകം പ്രത്യേക ഓർഡിനൻസ് പുറത്തിറക്കി യാത്ര സാധ്യമാക്കുകയായിരുന്നു. തന്നിൽ ഏല്പിച്ചിരിക്കുന്ന എം.പി എന്നുള്ള പദവി ജനങ്ങളെ സേവിക്കുക എന്നതാണെന്ന് ഒരു പ്രാവിശ്യം കൂടി തെളിയിച്ചിരിക്കുന്ന ബഹുമാന്യ സുരേഷ് ഗോപിക്ക് എല്ലാവിധ ആശംസകളും നേരുന്നു. തുടർന്നും സഹായഹസ്തവുമായി നയിക്കുവാൻ ജഗദീശ്വരൻ ആയുസ്സും ആരോഗ്യവും നല്കട്ടെയെന്നു പ്രാർത്ഥിക്കുന്നു.