കൊല്ലം: കോഴിക്കോട് മെഡിക്കൽ കോളേജിൽ പുതുതായി ഒരുക്കുന്ന കൊവിഡ് ഐ.സി.യു വാർഡിലേക്ക് ആൾ ഇന്ത്യാ ബാങ്ക് ഓഫീസേഴ്‌സ് അസോസിയേഷൻ കേരള സംസ്ഥാന കമ്മിറ്റി 13 ലക്ഷം രൂപ വിലവരുന്ന ഐ.സി.യു മോണിറ്ററുകളും മറ്റു ഉപകരണങ്ങളും സംഭാവന ചെയ്തു.

എ.ഐ.ബി.ഒ.എ മുൻ ജന. സെക്രട്ടറിയായിരുന്ന ആർ.ജെ. ശ്രീധരന്റെ ഏഴാം ചരമ വാർഷികത്തോട് അനുബന്ധിച്ച് നടന്ന ചടങ്ങിൽ മെഡിക്കൽ കോളേജ് പ്രിൻസിപ്പൽ ഡോ.വി.ആർ. രാജേന്ദ്രൻ ഉപകരണങ്ങളുടെ രേഖകൾ എ.ഐ.ബി.ഒ.എ സംസ്ഥാന ജന. സെക്രട്ടറി എം.ഡി. ഗോപിനാഥിൽ നിന്ന് ഏറ്റുവാങ്ങി. മെഡിക്കൽ കോളേജ് സൂപ്രണ്ട് ഡോ. സജീത് കുമാർ, ഡോ. ചാന്ദ്‌നി, ബയോ മെഡിക്കൽ എൻജിനീയർ ഇന്ദിര, എ.ഐ.ബി.ഒ.എ സംസ്ഥാന ഭാരവാഹികളായ സുധേഷ് ശ്രീധരൻ, എച്ച്. വിനോദ് കുമാർ, ഒ.പ്രജിത് കുമാർ, വി. ബാലമുരളി, ഷറഫുദീൻ മൂസക്കോയ എന്നിവർ സന്നിഹിതരായിരുന്നു.