ബീജിംഗ്: ബിയർ കുടിച്ചശേഷം 18 മണിക്കൂർ കിടന്നുറങ്ങിയ യുവാവ് മൂത്രസഞ്ചി തകർന്ന് ആശുപത്രിയിൽ. തുടർച്ചയായി പത്ത് ബോട്ടിൽ ബിയർ കുടിച്ച ശേഷം ഉറങ്ങിയ യുവാവിന്റെ മൂത്രസഞ്ചി തകർന്നു. ബിയർ കുടിച്ച ശേഷം ഉറങ്ങിപ്പോയ യുവാവ് ഇടക്ക് മൂത്രമൊഴിക്കാതിരുന്നതാണ് മൂത്രസഞ്ചി തകരാൻ കാരണം. സംഭവത്തെ തുടർന്ന് ഗുരുതരാവസ്ഥയിലായ ചൈനീസ് യുവാവ് ആശുപത്രിയിൽ ചികിത്സയിലാണ്.

വടക്കൻ ചൈനയിലെ ഷീജാങ് പ്രവിശ്യയിലാണ് സംഭവം. കടുത്ത വയറുവേദനയെ തുടർന്ന് 40കാരനായ ഹു എന്ന യുവാവിനെ ആശുപത്രിയിൽ എത്തിച്ചു. തുടർന്ന് നടത്തിയ പരിശോധനയിലാണ് മൂത്രസഞ്ചി തകർന്നതായി കണ്ടെത്തിയത്. തുടർച്ചയായി 10 ബോട്ടിൽ ബിയർ കുടിച്ച ശേഷം ഇയാൾ 18 മണിക്കൂറുകൾ നീണ്ട ഉറക്കത്തിലായിരുന്നു. ഇതിനിടയിൽ മൂത്രമൊഴിക്കാൻ പോലും എഴുന്നേറ്റില്ല. ഇതേ തുടർന്നാണ് മൂത്രസഞ്ചി തകർന്നത്.

മൂത്രസഞ്ചി തകർന്നതാണെന്ന് മനസ്സിലാക്കാൻ സാധിക്കാതിരുന്ന ഹു കടുത്ത വയറുവേദനയെ തുടർന്നാണ് ആശുപത്രിയിൽ എത്തിയത്. പരിശോധനയിൽ മൂത്ര സഞ്ചിയിൽ മൂന്ന് പൊട്ടലുകൾ കണ്ടെത്തി. സമ്മർദ്ദം അധികരിച്ചതു കൊണ്ടാണ് മൂത്ര സഞ്ചി തകർന്നതെന്നും ഡോക്ടർമാർ കണ്ടെത്തി. തുടർന്ന് ഇയാളെ ഉടൻ ശസ്ത്രക്രിയക്ക് വിധേയനാക്കുകയായിരുന്നു.

യുവാവിന്റെ ആരോഗ്യനിലയിൽ ഇപ്പോൾ പ്രശ്നമില്ലെന്ന് ഡോക്ടർമാർ അറിയിച്ചു. ഇത് എല്ലാവർക്കും സംഭവിക്കാവുന്ന കാര്യമാണ്, എന്നാൽ ഞങ്ങളുടെ ആശുപത്രിയിൽ ഹുവിന്റേത് അപൂർവമായ ഒരു കേസായിരുന്നു. മൂത്രസഞ്ചിക്ക് വലുതാവാൻ കഴിയുമെങ്കിലും 350 മുതൽ 500 മില്ലി ലിറ്റർ മൂത്രം മാത്രമേ അതിൽ ഉൾക്കൊള്ളാനാവൂ എന്നും ഡോക്ടർമാർ പറയുന്നു.