നന്തിക്കര: പറപ്പൂക്കര പഞ്ചായത്തിലെ കോണിക്കൽ ചിറ പുനരുദ്ധരിക്കുന്ന പ്രവർത്തനങ്ങൾക്ക് തുടക്കമായി. പഞ്ചായത്തിൽ തൂപ്പൻകാവ് മുതൽ ബ്ലാച്ചിറ വരെ മൂന്ന് കിലോ മീറ്ററോളം ഒഴുകുന്ന കോണിക്കൽ ചിറ തോട്ടിലെ ചെളിയും പുല്ലും നീക്കം ചെയ്ത് തോടിന്റെ ഒഴുക്ക് പുനസ്ഥാപിക്കലാണ് ഇതിലൂടെ ലക്ഷ്യമാക്കുന്നത്. പ്രളയത്തിനെ നേരിടുന്നതിന് മുന്നൊരുക്കം എന്ന നിലയിൽ പഞ്ചായത്തിലെ മുഴുവൻ തോടുകളും, നീർചാലുകളും വൃത്തിയാക്കുന്നതിന്റെ ഭാഗമായാണ് പ്രവൃത്തി. പഞ്ചായത്ത് വൈസ് പ്രസിഡന്റ് പി.ഡി. നെൽസൺ ഉദ്ഘാടനം ചെയ്തു. ഇരിങ്ങാലക്കുട ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അദ്ധ്യക്ഷൻ പി.വി. കുമാരൻ അദ്ധ്യക്ഷനായി.