തൃശൂർ: ജില്ലയിൽ 6 പേർക്ക് കൊവിഡ് സ്ഥിരീകരിച്ചു. ജൂൺ 11 ന് കുവൈറ്റിൽ നിന്ന് തിരിച്ചെത്തിയ എരനെല്ലൂർ സ്വദേശി (31), 15 ന് എത്തിയ തളിക്കുളം സ്വദേശി (35), 13 ന് എത്തിയ നടവരമ്പ് സ്വദേശി (32), 13 ന് ജിദ്ദയിൽ നിന്ന് തിരിച്ചെത്തിയ മാടായിക്കോണം സ്വദേശി (43), 8 ന് മദ്ധ്യപ്രദേശിൽ നിന്ന് തിരിച്ചെത്തിയ ചേലക്കോട്ടുക്കര സ്വദേശിനി (23), 17 ന് ഉത്തർപ്രദേശിൽ നിന്ന് തിരിച്ചെത്തിയ ചേറ്റുപുഴ സ്വദേശി (25) എന്നിവർക്കാണ് രോഗം സ്ഥിരീകരിച്ചത്. ഇതോടെ രോഗബാധിതരുടെ എണ്ണം 260 ആയി. കൊവിഡ് 19 സ്ഥിരീകരിച്ച 120 പേരാണ് ആശുപത്രികളിലുള്ളത്.

തൃശൂർ സ്വദേശികളായ 10 പേർ മറ്റ് ജില്ലകളിലെ ആശുപത്രികളിലുണ്ട്. ജില്ലയിൽ 14,223 പേരാണ് നിരീക്ഷണത്തിലുള്ളത്. ഇന്നലെ 8 പേരെ ആശുപത്രിയിൽ പ്രവേശിപ്പിച്ചു. 13 പേർ ആശുപത്രി വിട്ടു. 1,703 പേർ പുതുതായി നിരീക്ഷണത്തിലായപ്പോൾ 741 പേരെ പട്ടികയിൽ നിന്നും ഒഴിവാക്കി. ഇതു വരെ 7,165 സാമ്പിളുകൾ പരിശോധനയ്ക്ക് അയച്ചതിൽ 6,519 സാമ്പിളുകളുടെ ഫലം വന്നു. 646 എണ്ണത്തിന്റെ ഫലം ലഭിക്കാനുണ്ട്. വിവിധ മേഖലയിലുളള 2,453 ആളുകളുടെ സാമ്പിളുകളും പരിശോധനയ്ക്ക് അയച്ചു. 364 ഫോൺ കാളുകൾ ജില്ലാ കൺട്രോൾ സെല്ലിൽ ലഭിച്ചു. 183 പേർക്ക് കൗൺസലിംഗ് നൽകി. റെയിൽവേ സ്റ്റേഷനുകളിലും ബസ് സ്റ്റാൻഡുകളിലുമായി 547 പേരെ സ്‌ക്രീൻ ചെയ്തു.