ചാവക്കാട്: ശബരിമല ശ്രീധർമ്മ ശാസ്താ ക്ഷേത്രം ബലിക്കൽ പുരയുടെ സീലിംഗിൽ അഷ്ടദിക് പാലകരുടെയും ബ്രഹ്മാവിന്റെയും രൂപങ്ങളും ശ്രീകോവിലിന്റെ മുൻഭാഗത്ത് മണ്ഡപത്തിന്റെ സ്ഥാനത്ത് സീലിംഗിൽ നവഗ്രഹങ്ങളുടെ രൂപങ്ങളും നിർമ്മിക്കുന്നു. പൂർണ്ണമായും നിലമ്പൂർ തേക്കിൽ ദാരുശിൽപ്പി എളവള്ളി നന്ദനാണ് ശിൽപ്പങ്ങൾ ഒരുക്കുന്നത്.

ശിൽപ്പത്തിനുള്ള തടി തന്ത്രി കണ്ഠരര് മഹേശ്വര് മോഹനര് ശ്രീകോവിലിൽ പൂജിച്ച് ശിൽപ്പിക്ക് കൈമാറി. വിജയകുമാർ എന്ന ഭക്തന്റെ വഴിപാടായി ഒരുങ്ങുന്ന ശിൽപ്പങ്ങൾ എളവള്ളിയിലെ പണിപ്പുരയിലാണ് നിർമ്മിക്കുക. ശബരിമല ക്ഷേത്രം ശ്രീകോവിലിന്റെ സ്വർണ്ണ വാതിലിന്റെ നിർമ്മാണച്ചുമതലയും നന്ദനാണ് നിർവഹിച്ചത്.

ഗുരുവായൂർ ക്ഷേത്രം, മൂകാംബിക ക്ഷേത്രം, കൊൽക്കത്ത ഗുരുവായൂരപ്പൻ ക്ഷേത്രം, ബംഗളൂരു ജലഹള്ളി അയ്യപ്പക്ഷേത്രം തുടങ്ങിയിടങ്ങളിൽ നിരവധി ദാരുശിൽപ്പങ്ങൾ നിർമ്മിച്ചിട്ടുള്ള നന്ദൻ അന്തരിച്ച പ്രശസ്ത ദാരുശിൽപ്പി എളവള്ളി നാരായണനാചാരിയുടെ മകനാണ്. 2012 ൽ ദാരുശിൽപ്പ കലകൾക്ക് കേന്ദ്ര സർക്കാരിന്റെ സീനിയർ ഫെല്ലോഷിപ്പ് ലഭിച്ചിട്ടുള്ള നന്ദൻ നിലവിൽ 2000 വർഷം പഴക്കം കണക്കാക്കുന്നതും പെരുന്തച്ചൻ നിർമ്മിച്ചതെന്ന് പറയപ്പെടുന്ന ഹരികന്യക ഭഗവതീ ക്ഷേത്രത്തിന്റെ നവീകരണ പ്രവർത്തനത്തിലാണ്.