തിരുവനന്തപുരം: പമ്പയിലെ മണൽ നീക്കുന്ന വിഷയത്തിൽ പത്തനംതിട്ട ജില്ലാ കളക്ടർ പി.ബി. നൂഹിനെതിരെ സി.പി.ഐ അസിസ്റ്റന്റ് സെക്രട്ടറി കെ. പ്രകാശ് ബാബു. മണൽ നീക്കാനുള്ള കളക്ടറുടെ ഉത്തരവിൽ പിശകുണ്ടെന്നും ഇക്കാര്യത്തിൽ വനംവകുപ്പ് സ്വീകരിച്ച നിലപാട് ശരിയാണെന്നും പ്രകാശ് ബാബു പറഞ്ഞു.

കളക്ടർ പുറത്തിറക്കിയ ഉത്തരവാണ് പ്രശ്നങ്ങൾ വഷളാക്കിയതെന്നാണ് സി.പി.ഐ വിലയിരുത്തുന്നത്. കോരിമാറ്റുന്ന മണൽ എങ്ങോട്ടുവേണമെങ്കിലും കൊണ്ടുപോകാമെന്നാണ് കളക്ടറുടെ ഉത്തരവിലുള്ളത്. ഇത് നിയമപരമല്ല. മുൻ ചീഫ് സെക്രട്ടറിയുടെ സമ്മർദം കൊണ്ടാണോ കളക്ടർ ഇത്തരമൊരു ഉത്തരവ് ഇറക്കിയതെന്ന ചോദ്യത്തിന് കളക്ടറാണ് മറുപടി നൽകേണ്ടതെന്നും പ്രകാശ് ബാബു പറഞ്ഞു. വനത്തിൽനിന്ന് നീക്കുന്ന മണൽ വനമേഖലയിൽ തന്നെ നിക്ഷേപിക്കണമെന്ന വനംമന്ത്രിയുടെ നിലപാടാണ് നിയമപരമായി ശരി. സംസ്ഥാനത്ത് വീണ്ടുമൊരു പ്രളയത്തിനുള്ള സാദ്ധ്യത പ്രവചിക്കപ്പെട്ട സാഹചര്യത്തിൽ പമ്പയിലെ മണൽ നീക്കം ചെയ്യേണ്ടതാണെന്നും അദ്ദേഹം പറഞ്ഞു.