വെഞ്ഞാറമൂട്: കഴിഞ്ഞ ദിവസം പുലർച്ചെയുണ്ടായ ശക്തമായ കാറ്റിലും മഴയിലും റോഡരികിൽ നിന്ന മരം കടപുഴകി ഇലക്ട്രിക് ലൈനിന് മുകളിലൂടെ റോഡിന് കുറുകെ വീണു. വൈദ്യുതി വിതരണവും ഗതാഗതവും തടസപ്പെട്ടു. കഴിഞ്ഞ ദിവസം പുലർച്ചെ 8.30ന് പുത്തൻ പാലം - വെഞ്ഞാറമൂട് റോഡിൽ വെള്ളാഞ്ചിറ ആഡിറ്റോറിയത്തിന് മുൻവശത്തായിരുന്നു സംഭവം. റോഡരികിൽ നിന്ന കൂറ്റൻ വാകമരം കടപുഴകി വീഴുകയായിരുന്നു. സംഭവ സമയം സ്ഥലത്ത് വാഹനങ്ങളോ, യാത്രക്കാരോ ഇല്ലാതിരുന്നതിനാൽ ദുരന്തം ഒഴിവായി. നെടുമങ്ങാട് ഫയർഫോഴ്സ് സ്ഥലത്ത് എത്തി മരം മുറിച്ചു മാറ്റി ഗതാഗതം പുനഃസ്ഥാപിച്ചു. അറ്റകുറ്റപ്പണികൾക്ക് ശേഷമേ വൈദ്യുതി വിതരണം പുനഃസ്ഥാപിക്കാൻ കഴിയുകയുള്ളുവെന്ന് കെ.എസ്.ഇ.ബി അധികൃതർ അറിയിച്ചു.