മലപ്പുറം: കേരളത്തെയും തമിഴ്‌നാടിനെയും ബന്ധിപ്പിക്കുന്ന മലപ്പുറം നാടുകാണി ചുരത്തിൽ മരങ്ങൾ വീണ് ഗതാഗതം തടസപ്പെട്ടു. പച്ചക്കറി ഉൾപ്പെടെയുള്ള ഭക്ഷ്യവസ്തുക്കളുമായെത്തിയ നൂറോളം വാഹനങ്ങൾ ചുരത്തിൽ കുടുങ്ങിക്കിടക്കുകയാണ്. ചുരം പാതയിലെ തേൻപാറ, പോത്തും കുഴി തുടങ്ങിയ സ്ഥലങ്ങിലാന്ന് വൻ മരങ്ങൾ കടപുഴകി വീണത്.

ഇന്ന് രാവിലെ 6 മണിയോടെയാണ് സംഭവം. നിലമ്പൂരിൽ നിന്നു അഗ്നി സുരക്ഷ സേനയെത്തി മരങ്ങൾ മുറിച്ചു മാറ്റാൻ തുടങ്ങിയെങ്കിലും 2 മണിക്കൂർ കഴിഞ്ഞിട്ടും പൂർണമായി നീക്കം ചെയ്യാൻ സാധിച്ചിട്ടില്ല. ഇതിനിടയിൽ സഹായത്തിനായി ട്രൊമ കെയറും സന്നദ്ധ സംഘടനകളും എത്തിയിട്ടുണ്ട്.

പച്ചക്കറിയും മറ്റു ഭക്ഷ്യ വസ്തുക്കളുമായി വരുന്നതും കൊണ്ടുവരാൻ പോകുന്നതുമായ വാഹനങ്ങളാണ് ചുരത്തിൽ കുടുങ്ങിയത്. മഴ ശക്തിപ്പെട്ടാൽ ഇനിയും വിവിധയിടങ്ങളിൽ മണ്ണിടിച്ചിലിനും സാദ്ധ്യതയുണ്ട്.