കാലിഫോർണിയ: മറഞ്ഞിരിക്കുന്ന നിധി കണ്ടെത്തുക എന്നത് ചിലർക്ക് ഏറെ ഇഷ്‌ടമുള്ള ഒന്നാണ്. എന്നാൽ നിധി തേടി പോകുന്നതിനിടെ ചിലപ്പോൾ അവരെ കാത്തിരിക്കുന്നത് ദുരന്തങ്ങൾ ആകാം. അടുത്തിടെ വരെ നിധിവേട്ടക്കാർക്ക് പിടികൊടുക്കാതിരുന്ന ഒരു അമൂല്യ ശേഖരം അമേരിക്കയിൽ ഉണ്ടായിരുന്നു. റോക്കി പർവത നിരകളിൽ എവിടെയോ അമൂല്യ രത്നങ്ങളും സ്വർണ നാണയങ്ങളും ആഭരണങ്ങളും നിറച്ച ഒരു വെങ്കല പേടകമായിരുന്നു അത്. ഫോറസ്റ്റ് ഫെൻ എന്ന 88 കാരനായ ശതകോടീശ്വരനാണ് ഈ നിധിയുടെ ഉടമസ്ഥൻ.
കഴിഞ്ഞ ഒരു ദശാബ്ദമായി ആയിരക്കണക്കിന് പേർ റോക്കി പർവതനിരകളിൽ സ്വർണം, മരതകം, മാണിക്യം, വജ്രം തുടങ്ങിയ അമൂല്യവസ്തുക്കൾ നിറഞ്ഞ ഈ നിധി പേടം കണ്ടെത്താൻ അരിച്ചു പെറുക്കൽ ശ്രമിച്ചു. ഒടുവിലിതാ ആ സാഹസങ്ങൾക്കെല്ലാം അന്ത്യമായിരിക്കുന്നു. റോക്കി മലനിരകളിലെ ആ വിലക്കപ്പെട്ട നിധി കണ്ടെത്തിയിരിക്കുന്നു. ! പർവതനിരയിൽ നിധി പേടകം ഒളിപ്പിച്ച ഫോറസ്റ്റ് ഫെൻ തന്നെയാണ് ഇക്കാര്യം കഴിഞ്ഞ ദിവസം തന്റെ വെബ്സൈറ്റിലൂടെ വെളിപ്പെടുത്തിയത്.
എന്നാൽ നിധി കണ്ടെത്തിയ ആൾ ആരാണെന്ന് തനിക്കറിയില്ലെന്നും തന്റെ പുസ്തകത്തിലെ നിധിയെ കുറിച്ചുള്ള കവിതയാണ് ആ ഭാഗ്യവാനെ നിധിയുടെ കണ്ടെത്തലിലേക്ക് നയിച്ചതെന്നും ഫെൻ പറയുന്നു. കുറച്ച് ദിവസങ്ങൾക്ക് മുമ്പാണ് നിധി അയാൾ നിധി ശേഖരം കണ്ടെത്തിയതെന്ന് ഫെൻ പറഞ്ഞു. കിഴക്കൻ പ്രദേശത്ത് നിന്നുള്ള ഒരാൾ നിധി ശേഖരം കണ്ടെത്തി അതിന്റെ ചിത്രം തനിക്ക് അയച്ചതായും എന്നാൽ തന്റെ പേര് വെളിപ്പെടുത്തിയില്ലെന്നും ഫെൻ പറയുന്നു.
മുൻ വിയറ്റ്നാം ഫൈറ്റർ പൈലറ്റും ആർക്കിയോളജി‌സ്‌റ്റും ബിസിനസുകാരനുമാണ് ഫെൻ. താൻ കാൻസർ ബാധിതനാണെന്ന് തിരിച്ചറിഞ്ഞതോടെയാണ് ഫെൻ 2 മില്ല്യൺ ഡോളർ വിലമതിക്കുന്ന രത്നങ്ങളും സ്വർണവും നിറച്ച പേടകം റോക്കി പർവത നിരയിൽ ഒളിപ്പിച്ചത്. ആരാണ് പേടകം കണ്ടെത്തുന്നത് അവർക്കുള്ളതാണ് ഈ നിധിയെന്ന് ഫെൻ 2010ൽ പ്രഖ്യാപിച്ചിരുന്നു. അന്നു മുതൽ നിരവധി പേരാണ് നിധി കണ്ടെത്താൻ ഇറങ്ങി തിരിച്ചത്. പക്ഷേ, ആർക്കും നിധി കിട്ടിയിട്ടില്ലെന്ന് മാത്രമല്ല, നാല് നിധി വേട്ടക്കാർ ദുരൂഹ സാഹചര്യങ്ങളിൽ കൊല്ലപ്പെടുകയും ചെയ്തു.
40 പൗണ്ട് ഭാരം വരുന്ന നിധി പേടകം റോക്കി മലനിരകളിൽ എവിടെയാണെന്ന് ഫെന്നിന് മാത്രമേ അറിയാമായിരുന്നുള്ളു. സാന്റാ ഫേയുടെയും കനേഡിയൻ അതിർത്തിയുടെയും ഇടയിൽ സമുദ്രനിരപ്പിൽ നിന്നും 5,000 അടിയിലേറെ ഉയരമുള്ള ഭാഗത്താണ് താൻ നിധി ഒളിപ്പിച്ചിരിക്കുന്നതെന്ന് ഫെൻ പറയുന്നു. 2010ൽ 'ദ ത്രിൽ ഒഫ് ദ ചേയ്സ് ' എന്ന തന്റെ പുസ്‌തകത്തിലൂടെ നിധി ഒളിപ്പിച്ചിരിക്കുന്നത് എവിടെയെന്നത് സംബന്ധിച്ച സൂചനകൾ ഫെൻ ഒരു കവിതയുടെ രൂപത്തിൽ അവതരിപ്പിക്കുണ്ട്. ഇതിന്റെ അടിസ്ഥാനത്തിൽ ഇറങ്ങിപ്പുറപ്പെട്ടവരെല്ലാം നിരാശരായിയിരുന്നു.
ഫെന്നിന്റെ കവിതയ്‌ക്കിടയിൽ മറഞ്ഞിരിക്കുന്ന അർത്ഥം കണ്ടെത്തി നിധിയുടെ സ്ഥാനം തേടി പോകണമെന്ന് ചിലർ പറഞ്ഞിരുന്നു. ഫെന്നിന്റെ കവിതയിലെ വരികളിൽ പ്രതിപാദിക്കുന്ന പോലുള്ള സ്ഥലം റോക്കി മലനിരകളിൽ ആർക്കും കണ്ടെത്താനും കഴി‌ഞ്ഞിരുന്നില്ല. ലോകത്തിന്റെ പലഭാഗത്ത് നിന്നും ഇതേവരെ 350,000 പേർ തന്റെ നിധി കണ്ടെത്താനായി ഇതേവരെ എത്തിയെന്നാണ് ഫെൻ പറയുന്നത്. നിധി കണ്ടെത്തി എന്നല്ലാതെ നിധി റോക്കി മലനിരകളിൽ എവിടെയായിരുന്നു ഒളിപ്പിച്ചിരുന്നതെന്ന് ഫെൻ വെളിപ്പെടുത്തിയില്ല.