പത്തനംതിട്ട: ശബരിമലയിൽ ദർശനത്തിനായുള്ള ഓൺലൈൻ ബുക്കിംഗ് നാളെ മുതൽ ആരംഭിക്കും. മിഥുന മാസ പൂജയ്ക്കും ഉത്സവത്തിനുമായാണ് ശബരിമല നട തുറക്കുന്നത്. ബുക്ക് ചെയ്യുന്ന ഭക്തർ കൊവിഡ് നെഗറ്റീവാണെന്ന സർട്ടിഫിക്കറ്റ് ഹാജരാക്കണം. ജൂൺ 14നാണ് ക്ഷേത്ര നട തുറക്കുന്നത്. 19നാണ് കൊടിയേറ്റ്. സന്നിധാനത്ത് ഭക്തരെ തങ്ങാൻ അനുവദിക്കില്ല.

വെർച്ച്വൽ ക്യൂ വഴി ഒരേസമയം 50 പേർക്ക് ദർശനത്തിന് അനുമതി നൽകും. പൂജാരിമാർക്ക് ശബരിമലയിൽ പ്രായപരിധി പ്രശ്നമില്ല. ആരാധനാലയങ്ങൾ തുറക്കുന്നതിൽ ഇളവുകൾ ലഭിച്ചതിന് പിന്നാലെയാണ് ശബരിമല ക്ഷേത്രത്തിലും ഭക്തർക്ക് പ്രവേശനം അനുവദിക്കാൻ തീരുമാനിച്ചത്.

ഭക്തർക്ക് പ്രായപരിധിയിൽ നിയന്ത്രണമുണ്ട്. 10 വയസിന് താഴെയുള്ളവർക്കും 65 വയസിന് മുകളിലുള്ളവർക്കും പ്രവേശനമുണ്ടാവില്ല. പമ്പയിലും സന്നിധാനത്തും തെർമൽ സ്‌കാനിംഗ് നടത്തും. മാസ്‌ക് ധരിച്ചവർക്ക് മാത്രമായിരിക്കും പ്രവേശനം. വി.ഐ.പി ദർശനം ഉണ്ടാകില്ല. കൊടിയേറ്റവും ആറാട്ടും ചടങ്ങുകളായി മാത്രം നടത്തും. അന്നദാന സൗകര്യം ഉണ്ടായിരിക്കും. പമ്പ വരെ സ്വകാര്യ വാഹനങ്ങൾക്ക് പ്രവേശനം ഉണ്ടാവും. അപ്പം, അരവണയ്ക്കായി ഓൺലൈൻ വഴി ബുക്ക് ചെയ്യണം. വണ്ടി പെരിയാർ വഴിയുള്ള ദർശനവും ഇത്തവണ ഉണ്ടാകില്ല.