ലോസ്ആഞ്ചലസ് : അമേരിക്കൻ ഗായിക ബോണി പോയിന്റർ അന്തരിച്ചു. 69 വയസായിരുന്നു. ഹൃദയാഘാതത്തെ തുടർന്നായിരുന്നു മരണം. 1950ൽ കാലിഫോർണിയയിലെ ഓ‌ക്ക്‌ലാൻഡിൽ ജനിച്ച ബോണിയുടെ യഥാർത്ഥ പേര് പാട്രീഷ്യ ഇവാ പോയിന്റർ എന്നാണ്. ഗ്രാമി ഉൾപ്പെടെയുള്ള അവാർഡുകൾ നേടി 70കളിലും 80കളിലും തരംഗമായിരുന്ന പോയിന്റർ സിസ്‌റ്റേ‌ഴ്‌സ് ഗായക സംഘത്തിലെ അംഗമായിരുന്നു.

ഇവരുടെ ജംപ്, ഐ ആം സോ എക്സൈറ്റഡ് തുടങ്ങിയ ഗാനങ്ങൾ ഏറെ പ്രശ‌സ്‌തമാണ്. സഹോദരി ജൂൺ പോയിന്ററുമായി ചേർന്നാണ് ബോണി ആദ്യമായി സംഗീത ലോകത്തേക്ക് എത്തിയത്. പിന്നീട് അനീറ്റ, റൂത്ത് എന്നീ സഹോദരിമാരും ഒപ്പം ചേർന്നു. ജൂൺ പോയിന്റർ 2006ൽ മരിച്ചിരുന്നു. അനീറ്റ 2015 വരെ സംഘത്തിൽ തുടർന്നിരുന്നു.

റൂത്ത്, മകളായ ഇസ, ഇസയുടെ മകൾ സഡാകോ എന്നിവരാണ് ഇപ്പോൾ പോയിന്റർ സിസ്‌റ്റേഴസ് ഗായക സംഘത്തിലെ അംഗങ്ങൾ. 1975ലെ ' ഫെയറിടെയ്‌ൽ ' എന്ന ഗാനത്തിലൂടെയാണ് പോയിന്റർ സിസ്‌റ്റേ‌ഴ്‌സിനെ തേടി ആദ്യ ഗ്രാമി പുരസ്‌കാരം എത്തുന്നത്. 1977ൽ ബോണി സിസ്‌റ്റേഴ്‌സിൽ നിന്നും പിന്മാറിയ ബോണി പിന്നീട് സോളോ കരിയർ തുടരുകയായിരുന്നു. എന്നാൽ ഇതിന് ശേഷവും പേയിന്റർ സി‌സ്‌റ്റേഴ്‌സിന് അമേരിക്കയിൽ ഏറെ സ്വീകാര്യത ലഭിച്ചിരുന്നു. 1985ൽ 'ജംപ്', 'ഓട്ടോമാറ്റിക് ' എന്നീ ഗാനങ്ങൾക്കും ഗ്രാമി പുരസ്‌കാരങ്ങൾ ലഭിച്ചു. 1994ൽ ഹോളിവുഡ് വാക്ക് ഒഫ് ഫെയ്‌മിലും പോയിന്റർ സിസ്‌റ്റേ‌ഴ്‌സ് ഇടം നേടി.